Türkiyə–Ermənistan sərhədinin mümkün açılışı ərəfəsində münasibətlərin normallaşması prosesinə qarşı təbliğat xarakterli hücumlar intensivləşir.
Bu barədə “Orbeli” analitik mərkəzinin eksperti, şərqşünas Armen Petrosyan məlumat verib.
Ekspert “Facebook” səhifəsində yazır ki, Ermənistana qarşı davam edən informasiya hücumları — tez-tez “hibrid müharibə” kimi də xarakterizə olunan proses çərçivəsində — son günlər Türkiyə mətbuatında (“Aydınlık”, “Sözcü” nəşrləri) açıq şəkildə Türkiyə–Ermənistan münasibətlərinin normallaşmasına mane olmağa yönəlmiş material yayılıb. Sözügedən yazı eyni zamanda erməni mediasında da tirajlanır.
Məqalədə gələcəkdə Erməni Apostol Kilsəsinin liderinin kim olacağı məsələsinə toxunulur və iddia edilir ki, guya bu qərar Ermənistanın dini mərkəzi olan Eçmiədzin tərəfindən deyil, Ankara və İstanbul tərəfindən veriləcək.
Petrosyan qeyd edir ki, materialın mənbəyinin araşdırılması bir neçə proqnozlaşdırılan istiqaməti üzə çıxarır. Belə ki, “Aydınlık” qəzeti Türkiyənin “Vətən” Partiyası və onun anti-erməni mövqeləri ilə tanınan lideri Doğu Perinçəkin ideoloji platforması ilə sıx bağlıdır. Qəzet tez-tez Rusiya, İran və ya Çin siyasi gündəmi ilə uzlaşan mövqeləri ifadə edir və regionda Qərbin rolunu tənqid edir.
Bundan əlavə, bəzi məlumatlara görə, platformanın fəaliyyətini koordinasiya edən Perinçəkin oğlu hazırda Rusiyada yaşayır və çalışır, – deyə Armen Petrosyan vurğulayıb.
