ABŞ Prezidenti Donald Trampın Ağ Evdə keçirilən tədbir zamanı arxasında dayanan qadının onu gizli cihaz vasitəsilə “elektriklə oyatdığı” barədə sosial şəbəkələrdə yayılan qəribə nəzəriyyə həqiqəti əks etdirmir. Kadrlardakı qadın keçmiş Ağ Ev əməkdaşı və “The Conservateur” nəşrinin təsisçisi Ceymi Li Franklindir.
MSNews.az xəbər verir ki, hadisə avqustun 10-da Trampın Oval kabinetdə uşaqlar üçün peyvənd tövsiyələri ilə bağlı sərəncam imzaladığı tədbir zamanı baş verib. Ağ Evin rəsmi saytında tədbirin həmin tarixdə keçirildiyi və görüntülərin yayımlandığı təsdiqlənir.
“People” yazır ki, Trampın müəyyən anlarda gözlərini yumması, Franklinin isə eyni vaxtda əlini qarnına aparması sosial şəbəkələrdə zarafat və konspirologiya dalğası yaradıb. Bəzi istifadəçilər onun paltarının altında gizli düymə saxladığını və Tramp yuxulayan kimi həmin düymə ilə prezidenti “elektriklə oyatdığını” iddia ediblər. Bu nəzəriyyəni təsdiqləyən hər hansı sübut yoxdur.
Şayiələr o qədər geniş yayılıb ki, Franklin özü “X” hesabında məsələyə münasibət bildirib. O, viral paylaşımı sitat gətirərək qısa şəkildə yazıb: “Mən sadəcə hamiləyəm, axmaqlar!” və paylaşımına gülən emojilər əlavə edib.
Franklin hazırda konservativ qadınlara yönəlmiş “The Conservateur” media və həyat tərzi platformasının təsisçisi və baş icraçı direktorudur. Platformanın rəsmi məlumatına görə, o, daha əvvəl Trampın seçki kampaniyasında, Ağ Evdə və “Fox News”da çalışıb.
Beləliklə, sosial mediada “The Zapper” ləqəbi ilə yayılan hekayə real gizli cihaz barədə məlumat deyil, görüntülər əsasında yaranmış viral zarafat və əsassız nəzəriyyədir.
