ABŞ Prezidenti Donald Tramp Ukrayna Prezidenti Volodimir Zelenskini XIX əsrdə yaşamış məşhur amerikalı şoumen və sirk sahibkarı Fineas Teylor Barnumla (P. T. Barnum) müqayisə edib.
MSNews.az xəbər verir ki, Tramp bu barədə “Newsmax” telekanalına müsahibəsində danışıb. O, əvvəlki prezident Co Baydenin Ukraynaya böyük həcmdə hərbi yardım göstərməsini tənqid edərək Zelenskiyə istehzalı şəkildə Barnumun adını verib.
“Onlar ona çoxlu silah verdilər. Mən onu P. T. Barnum adlandırıram. P.T.Barnuma, yəni Zelenskiyə külli miqdarda “Patriot”, “Tomahawk” və başqa silahlar verdilər. Üstəlik, bunun üçün ondan pul da almadılar”, – deyə Tramp bildirib.
ABŞ Prezidenti müsahibəsində Bayden administrasiyasının Ukraynaya yüz milyardlarla dollar dəyərində yardım göstərdiyini iddia edib. Trampın sözlərinə görə, Vaşinqton əvvəlki dövrdə Kiyevə verdiyi silahların əvəzində ödəniş tələb etməli idi.
O, hazırkı administrasiyanın fərqli siyasət yürütdüyünü, Avropa ölkələrinin ABŞ istehsalı silahların alınması üçün ödəniş etdiyini bildirib. Tramp həmçinin Amerika ordusunun ehtiyatlarının artırılmasına üstünlük verdiyini vurğulayıb.
Qeyd edək ki, Trampın açıqlamasında Ukraynaya “Tomahawk” raketlərinin verildiyini iddia etməsi müstəqil şəkildə təsdiqlənməyib. ABŞ Prezidenti daha əvvəl bu raketlərin Ukraynaya tədarükü ilə bağlı müzakirələr aparıldığını bildirsə də, onların faktiki çatdırılmasına dair təsdiqlənmiş məlumat yoxdur.
