ABŞ Prezidenti Donald Tramp Omanı İranla Hörmüz boğazı üzrə apardığı danışıqların Vaşinqtonun maraqlarına mane olacağı təqdirdə hərbi zərbələrlə hədələyib.
MSNews.az xəbər verir ki, Tramp bu açıqlamanı “Fox News” telekanalının müxbiri Trey Yinqstə telefon müsahibəsində verib. ABŞ Prezidenti sərt ifadə işlədərək, “Əgər Oman yolumuza çıxsa, onları çox ağır şəkildə bombalayacağıq” deyib.
“Reuters” və “Associated Press” də Trampın Omanı birbaşa hərbi əməliyyatla hədələdiyini təsdiqləyib.
Açıqlama İran və Omanın Hörmüz boğazında kommersiya gəmiçiliyinin bərpasına dair ayrıca razılaşma üzərində işlədiyi bir vaxtda səslənib. İran Xarici İşlər Nazirliyinin sözçüsü İsmayıl Bəqai tərəflərin gəmilərin keçəcəyi marşrutun xəritəsi üzrə anlaşma əldə etdiyini və birgə bəyanatın detallarının hazırlandığını bildirib. ABŞ isə İran limanlarına tətbiq etdiyi dəniz blokadasını aradan qaldırmazdan əvvəl boğazın tam açılmasını tələb edir.
Hörmüz boğazının əhəmiyyəti xüsusilə enerji bazarları üçün böyükdür. “Reuters” bildirir ki, ABŞ və İsrailin fevralın sonunda İrana zərbələrindən əvvəl dünyada neft və mayeləşdirilmiş təbii qaz tədarükünün təxminən 20 faizi bu marşrutdan keçirdi. Müharibə və gəmiçiliyin məhdudlaşması enerji qiymətlərinə ciddi təzyiq göstərib.
Tramp eyni müsahibədə İrana qarşı mövqeyini də sərtləşdirərək Tehranın “təslimiyyətin ağ bayrağını qaldırmalı olduğunu” söyləyib. Daha sonra Ağ Evdə jurnalistlərə danışan prezident İranın ABŞ-ın tələb etdiyi razılaşmanı qəbul edəcəyinə inanmadığını və Vaşinqtonun əsas məqsədinin Tehranın nüvə silahı əldə etməsinin qarşısını almaq olduğunu bildirib.
ABŞ və İran arasında iyunun 17-də imzalanmış memorandum yekun razılaşma üçün maksimum 60 günlük danışıqlar müddəti müəyyənləşdirmişdi. Lakin atəşkəs qısa müddətdə pozulub: Tramp iyulun 7-də razılaşmanın “bitdiyini”, İran Xarici İşlər Nazirliyi isə bir həftə sonra onun dayandırıldığını açıqlayıb. Avqustun 17-də 60 günlük müddət başa çatarkən Tramp sənədin uzadılmasına çalışmadığını bildirib.
Oman uzun müddətdir Vaşinqtonla Tehran arasında diplomatik vasitəçi rolunu oynayır. “Associated Press” qeyd edir ki, bu, Trampın Maskata qarşı ilk belə təhdidi deyil: ABŞ Prezidenti may ayında da Oman Vaşinqtonun mövqeyinə uyğun davranmasa, ölkəyə qarşı güc tətbiq edilə biləcəyini söyləmişdi.
Tramp həmçinin noyabrda keçiriləcək aralıq seçkilərinin İran siyasətinə təsir göstərdiyini rədd edib. “Aralıq seçkilərinin mənim düşüncələrimlə heç bir əlaqəsi yoxdur”, – ABŞ Prezidenti bildirib.
