ABŞ Prezidenti Donald Tramp administrasiyanın əsas nümayəndələrinə İran rəsmiləri ilə danışıqları müvəqqəti dayandırmağı tapşırıb. Vaşinqtonun Tehranla bağlı strategiyasını sürətli nəticə əldə etmək cəhdindən daha uzunmüddətli təzyiq modelinə dəyişdirdiyi bildirilir.
MSNews.az xəbər verir ki, “CNN” mənbələrinə görə, göstəriş vitse-prezident Cey Di Vens, xüsusi nümayəndə Stiv Uitkoff və Trampın nümayəndəsi Cared Kuşner də daxil olmaqla danışıqlarda iştirak edən yüksək səviyyəli rəsmilərə verilib.
CNN-in məlumatına görə, Ağ Evdəki yanaşma İranı mümkün qədər qısa müddətdə güzəştə məcbur etmək cəhdindən Tehrana uzun müddət ərzində təzyiq göstərmək strategiyasına doğru dəyişir. Mənbələr bildiriblər ki, Tramp İran rəhbərliyindən mövqeyində yeni çeviklik görməyincə danışıqları bərpa etmək istəmir.
Bununla yanaşı, söhbət ABŞ-ın hərbi variantdan tamamilə imtina etməsindən getmir. Yeni xəttin əsas elementləri kimi İran iqtisadiyyatına əlavə təzyiq, yeni sanksiyalar və mövcud dəniz blokadasının davam etdirilməsi göstərilir. CNN-in mənbələri yeni sanksiyaların yaxın zamanda tətbiq edilə biləcəyini bildiriblər.
Tramp özü də avqustun 18-də İranla hazırda heç bir danışığın aparılmadığını və yeni danışıqların planlaşdırılmadığını açıqlayıb. “Reuters” bildirir ki, ABŞ Prezidenti eyni zamanda İran limanlarına qarşı dəniz blokadasının qüvvədə qaldığını deyib.
Bu açıqlama administrasiya daxilindən cəmi bir gün əvvəl gələn daha nikbin mesajla ziddiyyət təşkil edir. Cared Kuşner avqustun 17-də Tehranla təmasların davam etdiyini və dialoqun əvvəlkindən daha intensiv olduğunu bildirmişdi. Trampın son göstərişi isə həmin diplomatik xəttin ən azı müvəqqəti olaraq dayandırıldığını göstərir.
İran tərəfi isə dialoq imkanını tam bağlamadığını bildirir. İran Ali rəhbərinin müşaviri Məhəmməd Müxbər ölkəsinin ABŞ-la danışıqlara açıq olduğunu, lakin danışıqları “təslim olmaq” kimi qəbul etməyəcəyini deyib. Tehran ABŞ-ın sanksiyalarının və hərbi təzyiqinin onu geri çəkilməyə məcbur etməyəcəyini bildirir.
