ABŞ Prezidenti Donald Tramp üzərində öz imzası olan 100 dollarlıq əsginasın görüntüsünü paylaşıb.
MSNews.az xəbər verir ki, Tramp görüntünü özünün “Truth Social” hesabında yayımlayıb. “CNN Newsource”-un məlumatına görə, şəkildə Trampın imzası ABŞ maliyyə nazirinin imzasının üzərində yerləşdirilib. Paylaşım Tramp tərəfindən əlavə izah olmadan edilib.
ABŞ Maliyyə Nazirliyi mart ayında Trampın imzasının gələcək ABŞ kağız pullarında yer alacağını rəsmən açıqlamışdı. ABŞ Maliyyə Nazirliyi bu qərarın ölkənin 250 illiyi münasibətilə qəbul edildiyini və bunun ABŞ tarixində vəzifədə olan prezidentin imzasının kağız valyutada görünməsi baxımından ilk hadisə olacağını bildirmişdi.
“Reuters”-in məlumatına görə, Trampın və ABŞ maliyyə naziri Skott Bessentin imzası olan ilk 100 dollarlıq əsginasların çapına iyunda başlanması planlaşdırılmışdı. Agentlik qeyd edir ki, bu dəyişikliklə 1861-ci ildən bəri ABŞ federal valyutasında yer alan xəzinədarın imzası ilk dəfə yeni dizayndan çıxarılır.
Maliyyə Nazirliyi yeni 100 dollarlıq əsginasların hazırda dövriyyəyə buraxılıb-buraxılmadığı barədə ayrıca məlumat açıqlamayıb. “WBRC” CNN Newsource-a istinadən yazır ki, tarixən 100 dollarlıq əsginaslarda ABŞ maliyyə naziri və ABŞ xəzinədarının imzaları yer alıb; vəzifədə olan prezidentin imzasının əlavə edilməsi isə bu əsginas üçün ilk olacaq.
Qeyd edək ki, söhbət Trampın portretinin əsginasda yerləşdirilməsindən yox, onun imzasının əlavə olunmasından gedir. “ABC 10News” daha əvvəl fakt-yoxlama materialında Trampın portretinin yeni 100 dollarlıq əsginaslarda yer alacağına dair iddiaların doğru olmadığını, Benjamin Franklinin portretinin dəyişməyəcəyini yazmışdı. “Reuters” də ABŞ qanunlarının Federal Ehtiyat əsginaslarında yalnız vəfat etmiş şəxslərin portretlərinə icazə verdiyini qeyd edir.
