Elm və Təhsil Naziri Emin Əmrullayevin əmri ilə Nicat Məmmədli Təhsilin İnkişafı Fonduna sədr təyin olunub.
Nicat Məmmədli 1997-ci ildə Bakı Dövlət Universitetinin Sosial Elmlər və Psixologiya fakültəsinin Politologiya ixtisasını, 1999-cu ildə isə BDU-nun Siyasi Proseslər ixtisası üzrə magistraturasını fərqlənmə diplomu ilə bitirib. 2002-ci ildə universitetin dissertanturasına daxil olub.
2010-cu ildə ABŞ-nin Qərbi İllinoys Universitetinin magistraturasını İctimai Siyasət ixtisası üzrə bitirib. 1999–2008-ci illərdə Bakı Dövlət Universitetində Politologiya və Sosiologiya kafedrasında, 2003–2006-cı illərdə isə Azərbaycan Respublikası Silahlı Qüvvələrinin Hərbi Akademiyasında müəllim kimi çalışıb.
2005–2007-ci illərdə Azərbaycan Respublikası Gənclər Təşkilatları Milli Şurasının Baş Katibi, 2006–2007-ci illərdə ABŞ-nin Kolumbiya Universitetində sosial siyasət üzrə təkmilləşdirmə proqramında iştirakçı olub. Eyni zamanda, ARGTMŞ-in BMT-nin Nyu-York qərargahındakı təmsilçisi olub.
2007-ci ilin iyun–dekabr aylarında Azərbaycan Respublikasının Ombudsmanın Uşaq Hüquqları Bölməsinin rəhbəri, 2008–2010-cu illərdə ABŞ-nin Qərbi İllinoys Universitetində müəllim assistenti vəzifəsində çalışıb.
2010–2013-cü illərdə SOCAR-da Sosial İnfrastrukturun İdarə Edilməsi Şöbəsində böyük mühəndis, 2013–2018-ci illərdə Dini Qurumlarla İş üzrə Dövlət Komitəsinin Beynəlxalq Əlaqələr Şöbəsinin müdiri olub.
2018-ci ildən Elm və Təhsil Nazirliyində Beynəlxalq Əməkdaşlıq Şöbəsinin müdiri, Elm, Ali və Orta İxtisas Təhsili Şöbəsinin müdiri və nazirin müşaviri vəzifələrində fəaliyyət göstərib.
Nicat Məmmədli iki monoqrafiya və 50-dən çox elmi məqalənin müəllifidir.
