Suriya keçmiş banknotlarını tədricən dövriyyədən çıxararaq yeni milli valyutanı rəsmi şəkildə təqdim edib. Bu barədə ölkə paytaxtı Dəməşqdə keçirilən mərasimdə məlumat verilib.
Dəməşqdəki Konfrans Sarayında keçirilən təqdimat mərasimində Suriya Prezidenti Əhməd əl-Şaraa, Türkiyənin Suriyadakı səfiri Nuh Yılmaz və dövlət rəsmiləri iştirak edib. Yeni pul vahidinin istifadəyə verilməsi, köhnə pulların mərhələli şəkildə ləğv edilərək yenisi ilə əvəzlənməsi prosesinin başladığını açıqlayıblar.
Prezident Şaraa çıxışında bu addımı keçmiş dövrün bitdiyini və modern iqtisadi proseslərin başlanğıcını işarə edən əhəmiyyətli addım kimi qiymətləndirib. O, valyutada sıfırların çıxarılması və yeni banknotların dövriyyəyə buraxılmasının əməliyyatları sadələşdirəcəyini və uzunmüddətli perspektivdə iqtisadi inama töhfə verəcəyini vurğulayıb.
Suriya Mərkəzi Bankının rəhbəri Abdulkadir Husri mərasimdə bildirib ki, yeni banknotlar iqtisadi sabitlik, maliyyə şəffaflığı və pul siyasətinin yenidən qurulması məqsədilə hazırlanıb. O, qeyd edib ki, bu dəyişiklik pulun nominal dəyərini dəyişdirmir — sadəcə sıfırların çıxarılması həyata keçirilir.
Husri yeni pul vahidinin dövriyyəyə buraxılmasının əsas hədəflərindən birinin alqı-satqı əməliyyatlarını daha praktik etmək, dolların dominant mövqeyini azaltmaq və yerli valyutaya inamı artırmaq olduğunu qeyd edib. O, həmçinin əhalini panikaya düşməməyə çağırıb və köhnə banknotların tədricən əvəzlənməsi prosesində hər hansı böyük maliyyə təsirinin olmayacağını bildirib.
Yeni banknotların dövriyyəyə verilməsi ilə bağlı çevrilmə prosesi 90 gün ərzində başa çatdırılacaq və lazım gələrsə bu müddət uzadıla bilər. Bu dövrdə həm köhnə, həm də yeni pul vahidləri ilə alış-veriş və ödənişlər aparılacaq.
Bu valyuta islahatı, Suriya iqtisadiyyatını müharibədən sonra bərpa etmək və uzun illər ərzində zəifləmiş milli valyutanın etibarını bərpa etmək məqsədi daşıyan geniş monetar islahatların bir hissəsidir. Mərkəzi Bankın açıqlamalarına görə, yeni pul vahidi istifadəçi rahatlığını artırmaq və bazar şəraitini stabilləşdirmək üçün nəzərdə tutulub.
