İmişli Rayon Ağsaqqallar Şurasının keçmiş sədri Saleh Səmədov 8 il müddətinə azadlıqdan məhrum edilib. Külli miqdarda mənimsəmə və vəzifə səlahiyyətlərindən sui-istifadədə təqsirli bilinən sabiq sədr barəsində hökm Bakı Ağır Cinayətlər Məhkəməsində elan olunub.
MSNews.az xəbər verir ki, bu barədə “APA” və “Report” məlumat yayıb.
Oktyabrın 15-də Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə keçirilən prosesdə Saleh Səmədovun cinayət işi üzrə hökm oxunub. Məhkəmənin qərarına əsasən, Saleh Səmədov 8 il müddətinə azadlıqdan məhrum edilib.
Məlumata görə, dövlət ittihamçısı onun 9 il müddətinə azadlıqdan məhrum olunmasını tələb etmişdi. Lakin məhkəmə bir il daha az həbs cəzası təyin edib. Məhkəmə iclasında cinayət işi üzrə dəymiş maddi ziyanın tam ödənildiyi də açıqlanıb.
“Müsavat” nəşrinin məlumatına görə, cinayət işi üzrə dövlət büdcəsinə vurulan ziyanın ümumi məbləği 200 min manat təşkil edib. Saleh Səmədov ibtidai istintaq dövründə həmin məbləğin 44 min manatını ödəyib. Qalan vəsait isə məhkəmənin son iclası ərəfəsində oğlu tərəfindən dövlət büdcəsinə qaytarılıb.
Saleh Səmədov daha əvvəl Dövlət Təhlükəsizliyi Xidməti (DTX) tərəfindən saxlanılıb və barəsində həbs qətimkan tədbiri seçilib. O, Azərbaycan Respublikası Cinayət Məcəlləsinin 179.3.2-ci (külli miqdarda mənimsəmə) və 308.1-ci (vəzifə səlahiyyətlərindən sui-istifadə etmə) maddələri ilə ittiham olunub.
Qeyd edək ki, Saleh Səmədov 2025-ci il mayın 13-də İmişli Rayon Ağsaqqallar Şurasının sədri vəzifəsindən azad edilib.
Məhkəmənin son hökmü ilə sabiq sədrin cinayət işi üzrə birinci instansiya məhkəməsində baxış yekunlaşıb.
