Rusiyanın Tatarıstan və Samara vilayətlərində bir neçə neft-kimya və sənaye obyektinin PUA hücumuna məruz qaldığı bildirilir.
MSNews.az xəbər verir ki, “Reuters” agentliyinin məlumatına görə, Tatarıstanın Nijnekamsk şəhərində PUA təhlükəsi səbəbindən iyunun 12-nə planlaşdırılan bütün kütləvi tədbirlər ləğv olunub. Şəhər meri Radmir Belyayev qərarın təhlükəsizlik məqsədilə qəbul edildiyini bildirib.
Agentlik qeyd edir ki, Nijnekamskda “SIBUR”a məxsus “Nijnekamskneftekhim” neft-kimya kompleksi və “Tatneft”ə məxsus “Taneco” neft emalı zavodu da daxil olmaqla bir sıra iri sənaye obyektləri yerləşir. Rusiya Müdafiə Nazirliyi isə gecə ərzində ölkənin müxtəlif regionları üzərində 231 Ukrayna PUA-sının vurulduğunu iddia edib.
“Настоящее Время” yazır ki, gecə saatlarında Tatarıstandakı neft emalı zavodu və Samara vilayətindəki “Tolyattikauçuk” kimya müəssisəsi hücuma məruz qalıb. Nəşrin məlumatına görə, Tatarıstan rəhbəri Rüstəm Minnixanov dronların Zakamsk regionuna çatdığını təsdiqləyib və hücuma məruz qalan müəssisələrin nəticələri aradan qaldırdığını bildirib.
Minnixanovun açıqlamasına əsasən, PUA-lardan biri Nijnekamskda yaşayış binasına düşüb. Nəticədə üç nəfərin xəsarət aldığı, sakinlərin təxliyə edildiyi və müvəqqəti yerləşdirmə məntəqəsinin hazırlandığı bildirilir.
“Kyiv Post” monitorinq kanallarına istinadən yazır ki, Nijnekamskda “Nijnekamskneftekhim” kompleksi və “Taneco” neft emalı zavodu zərbə altında qalıb. Nəşrin məlumatına görə, yayılan görüntülərdə qalın qara tüstü ilə müşayiət olunan yanğınlar görünür. İlkin məlumatlarda “Taneco”da iki AVT qurğusu və rezervuar parkının zədələnə biləcəyi qeyd olunur. Bu məlumat hələlik müstəqil şəkildə tam təsdiqlənməyib.
Samara vilayətində də PUA hücumu ilə bağlı xəbərdarlıq elan olunub. “Reuters” Samara qubernatoru Vyaçeslav Fedorişşevə istinadən Tolyatti şəhərinin dron hücumuna məruz qaldığını yazır. “Kyiv Independent” isə Ukrayna hərbçilərinin hələlik bu zərbələrlə bağlı rəsmi şərh vermədiyini və zərərin miqyasının dəqiqləşdirilmədiyini qeyd edir.
“Tolyattikauçuk” Rusiyanın iri kimya müəssisələrindən biri hesab olunur və sintetik kauçuk, monomerlər, polimerlər, eləcə də avtomobil benzini üçün qatqılar istehsal edir. “Kyiv Post”un məlumatına görə, müəssisə “Tatneft” qrupuna daxildir.
Hadisələr Rusiyada milli bayram — Rusiya Günü ərəfəsində baş verib. Hücumlar Ukraynanın son aylarda Rusiyanın yanacaq-energetika və hərbi-sənaye infrastrukturlarına qarşı uzaqmənzilli PUA zərbələrini artırdığı dövrə təsadüf edir.
