“Sabah”ın icraçı direktoru Ramin Həsənov UEFA Çempionlar Liqasının 2026/27 mövsümünün liqa mərhələsinin püşkünü klub üçün böyük fürsət və ciddi sınaq kimi qiymətləndirib.
MSNews.az xəbər verir ki, Həsənov Rusiyanın “Sovetski Sport” nəşrinə açıqlamasında xüsusilə “Barselona”nın Bakıya gəlməsini Azərbaycan futbolu üçün xüsusi hadisə adlandırıb.
“Püşkatmanın nəticələrini çox müsbət qiymətləndiririk. “Barselona”nın Azərbaycana gəlişi təkcə klubumuz və azarkeşlərimiz üçün deyil, bütün ölkə üçün böyük futbol bayramıdır. Komanda, xüsusən də gənc oyunçular üçün belə səviyyəli klubla qarşılaşmaq əvəzsiz təcrübə və əlavə motivasiya olacaq”, – deyə Həsənov bildirib.
Klub rəsmisi rəqibin səviyyəsini yaxşı anladıqlarını, bununla belə “Sabah”ın Azərbaycan futbolunu layiqincə təmsil etməyə çalışacağını vurğulayıb.
“Rəqibin gücünü anlayırıq. Lakin Azərbaycan futbolunu layiqincə təmsil etməyə və bu matçın azarkeşlərimizin yaddaşında qalması üçün əlimizdən gələni etməyə çalışacağıq”, – o qeyd edib.
Həsənovun sözlərinə görə, Çempionlar Liqasındakı iştirak “Sabah” üçün yalnız idman baxımından deyil, təşkilati və idarəetmə nöqteyi-nəzərindən də mühüm təcrübə olacaq.
“Bu turnirdəki hər bir an bizim üçün bütün istiqamətlərdə – idman baxımından, ev və səfər oyunlarının təşkili və hazırlığı, eləcə də planlaşdırma baxımından böyük təcrübədir. Dünyanın ən yaxşı klublarından biri ilə qarşılaşmaq bütün komanda üçün əvəzolunmaz təcrübə olacaq”, – icraçı direktor əlavə edib.
UEFA-nın avqustun 27-də Monakoda keçirdiyi püşkatmanın nəticəsinə əsasən, “Sabah” liqa mərhələsində səkkiz fərqli rəqiblə qarşılaşacaq.
Azərbaycan çempionu Bakıda “Barselona”, Dortmund “Borussiya”sı, “Napoli” və Praqa “Slaviya”sını qəbul edəcək. Səfər oyunlarında isə rəqiblər “Arsenal”, “Mançester Yunayted”, “Vilyarreal” və “Vikinq” olacaq.
“Sabah” tarixində ilk dəfə UEFA Çempionlar Liqasının liqa mərhələsində çıxış edəcək. Turnirin bu mərhələsində hər klub səkkiz oyun keçirir – dördü evdə, dördü səfərdə.
Çempionlar Liqasının liqa mərhələsinə sentyabrın 8–10-da start veriləcək və son tur 2027-ci il yanvarın 27-də keçiriləcək.
