İlham Əliyev “John Deere”in Mərkəzi Asiya və MDB üzrə prezidentini qəbul etdi – Azərbaycanda kənd təsərrüfatında yeni layihələr müzakirə olunub
Azərbaycan Prezidenti İlham Əliyev dekabrın 10-da “John Deere” şirkətinin Mərkəzi Asiya və MDB ölkələri üzrə prezidenti və “John Deere Walldorf International” MMC-nin baş icraçı direktoru Ksaba Leyko ilə görüş keçirib.
Görüşdə Azərbaycanda kənd təsərrüfatının yüksələn potensialı və bu sahənin dövlət dəstəyi ilə sürətli inkişafı xüsusi vurğulanıb. Qonaq “John Deere”in Azərbaycanda fəaliyyətinin uğurla davam etdiyini bildirib və əməkdaşlığın genişləndirilməsinə dair marağı ifadə edib. O, pambıqçılıq sənayesi ilə bağlı şirkətin yeni layihəsi barədə məlumat verib.
Ksaba Leyko Bakıda müşahidə etdiyi inkişafı “dərin təəssürat” kimi qiymətləndirib.
Tərəflər kənd təsərrüfatında rəqəmsallaşma, suvarma sistemləri, logistika, pambıq və taxıl istehsalı üzrə dəyər zəncirinin modernləşdirilməsi, həmçinin təhsil və təlim mərkəzinin yaradılması kimi məsələləri müzakirə ediblər.
Qeyd edilib ki, 1837-ci ildə ABŞ-da yaradılmış “John Deere” bu gün kənd təsərrüfatı və tikinti avadanlıqlarının istehsalı üzrə dünyanın aparıcı şirkətlərindəndir. Şirkətin illik gəliri 52 milyard dollara yaxındır və 30-dan çox ölkədə zavod və ofisləri fəaliyyət göstərir.
