Azərbaycan Prezidenti İlham Əliyev, birinci xanım Mehriban Əliyeva və ailə üzvləri mayın 1-də Bakının Səbail və Yasamal rayonlarını əhatə edən İslam Səfərli küçəsinin yenidənqurmadan sonra açılışında iştirak ediblər. Bakı Şəhər İcra Hakimiyyətinin başçısı Eldar Əzizov dövlət başçısına və birinci xanıma görülən işlər barədə məlumat verib.
Layihə çərçivəsində Azərbaycan prospektindən başlayaraq Nigar Rəfibəyli küçəsinin bir hissəsi də daxil olmaqla, İslam Səfərli küçəsi boyunca Mirzəağa Əliyev küçəsinədək olan ərazi tam abadlaşdırılıb. Ərazidən Mərkəzi Parka piyadaların rahat hərəkəti üçün keçid təmin edilib.
İslam Səfərli küçəsi ilə kəsişən 8 küçədə, həmçinin Təbriz Xəlilbəyli və Mirzə İbrahimov küçələrinə qədər olan hissədə də abadlıq işləri aparılıb. Ümumilikdə abadlaşdırılan küçələrin uzunluğu 1350 metr təşkil edir. Bu ərazilərdə su və çirkab su xətləri tam yenilənib, qaz xətləri isə yeraltı sistemə keçirilib.
Küçələrdə yerləşən müxtəlif təyinatlı binalarda yenidənqurma və bərpa işləri görülüb, sakinlər və paytaxt qonaqları üçün istirahət məkanları yaradılıb. Ərazidə oturacaqlar quraşdırılıb, geniş yaşıllaşdırma işləri həyata keçirilib.
Layihənin əsas məqsədlərindən biri Fəvvarələr meydanından Qış parkına birbaşa piyada bağlantısı yaratmaqdır. Ərazidə XIX əsrin sonu — XX əsrin əvvəllərinə aid yerli əhəmiyyətli memarlıq abidələrinin yerləşməsi də küçənin turistik və tarixi cəlbediciliyini artırır.
Avtomobil yollarının piyada zonaları ilə əvəzlənməsi ərazidə fəaliyyət göstərən mağaza, kafe və restoranlar üçün də yeni imkanlar yaradacaq. Layihə Bakıda müasir şəhərsalma, mikromobillik və piyada yönümlü infrastrukturun inkişafı istiqamətində həyata keçirilən tədbirlərin davamı kimi qiymətləndirilir.
