Portuqaliya Avropa İttifaqında hər gün spirtli içki qəbul edən insanların payına görə birinci yerdə qərarlaşıb. Eurostatın 2025-ci il üzrə məlumatlarına əsasən, ölkədə 16 və daha yuxarı yaşlı əhalinin 16%-i spirtli içkiləri gündəlik qəbul etdiyini bildirib.
MSNews.az xəbər verir ki, bu göstərici Aİ üzrə orta səviyyədən üç dəfədən çox yüksəkdir. İttifaq üzrə 16 yaşdan yuxarı insanların 4,8%-i hər gün, 19,2%-i hər həftə, 21,8%-i isə hər ay spirtli içki qəbul etdiyini bildirib.
Ölkələr arasında Portuqaliyadan sonra İtaliya 7,9%-lə ikinci, Belçika və Danimarka isə hər biri 7,5%-lə üçüncü yerdə qərarlaşıb. Növbəti yerləri Niderland və Fransa tutur.
“Eurostat”ın statistikası həmçinin gündəlik spirtli içki qəbulunun yaş artdıqca daha çox yayıldığını göstərir. Aİ-də 16–24 yaşlıların yalnız 0,8%-i hər gün spirtli içki qəbul etdiyi halda, 65 və daha yuxarı yaş qrupunda göstərici 8,9%-ə çatır.
Gender fərqi də nəzərəçarpandır. 2025-ci ildə Aİ-də kişilərin 56,5%-i ayda ən azı bir dəfə spirtli içki qəbul etdiyini bildirib. Qadınlar arasında bu göstərici 35,9% olub.
Eyni zamanda, Aİ əhalisinin üçdəbirindən çoxu — 33,5%-i — 2025-ci ildə ümumiyyətlə spirtli içki qəbul etmədiyini və ya həyatında heç vaxt qəbul etmədiyini bildirib. Daha 20,7% isə ayda bir dəfədən az içki qəbul edib.
Qeyd edək ki, bu statistika ölkələrdə istehlak olunan alkoqolun ümumi həcmini deyil, insanların spirtli içki qəbul etmə tezliyini ölçür. Buna görə Portuqaliyanın birinci olması ölkədə adambaşına ən çox spirt istehlak edildiyi anlamına gəlmir.
Məlumatlar Eurostatın “Key figures on European living conditions – 2026” hesabatında dərc edilib.
