Ermənistanın Baş naziri Nikol Paşinyan TRIPP layihəsi ilə bağlı İranın mümkün narahatlıqlarına münasibət bildirib.
MSNews.az xəbər verir ki, Paşinyan jurnalistlərə açıqlamasında layihə ətrafında “heç bir konspirasiya” olmadığını deyib. Onun sözlərinə görə, əsas məqsəd Ermənistanın və bütövlükdə regionun blokadadan çıxarılmasıdır. Paşinyan bildirib ki, dəmir yolu və avtomobil yolları işləməli, elektrik enerjisinin tranziti, gələcəkdə isə qaz və neft kəmərləri, boru xətləri və kabellər üzrə bağlantılar mümkün olmalıdır.
“TASS” yazır ki, Paşinyan bu fikirləri İranın Ermənistandakı səfiri Xəlil Şirgəlaminin ABŞ-ın sərhəd yaxınlığında mümkün iştirakı ilə bağlı narahatlığına cavab olaraq səsləndirib.
Paşinyan vurğulayıb ki, Ermənistan bütün suallara cavab verməyə hazırdır və bu mesaj İran tərəfinə də çatdırılıb. Onun sözlərinə görə, narahatlıqların nədən ibarət olduğu dəqiq formalaşdırılmalı, bundan sonra onlar müzakirə yolu ilə aradan qaldırılmalıdır. “ArmInfo” İran səfirinin TRIPP layihəsi çərçivəsində ABŞ-ın İran sərhədləri yaxınlığında mövcudluğu ilə bağlı risklərin qiymətləndirilməli olduğunu dediyini yazıb.
Ermənistan hökumətinin mövqeyinə görə, TRIPP layihəsi yalnız Azərbaycanla Naxçıvan arasında bağlantı deyil, həm də daha geniş regional kommunikasiya modelidir. Paşinyan bildirib ki, Ermənistan İran, Rusiya, Gürcüstan, Azərbaycan, Türkiyə, Avropa İttifaqı, Mərkəzi Asiya ölkələri və Çinlə işləməyə davam edəcək. Onun sözlərinə görə, layihə “qlobal xarakter” daşıyır və zaman keçdikcə onun strateji dəyəri daha da artacaq. “TASS” Paşinyanın “ilk yerüstü işlərin bu ilin payızında başlamasına” ümid etdiyini yazıb.
Paşinyan həmçinin bildirib ki, TRIPP layihəsinin icrası nəticəsində Fars körfəzindən Qara dənizə qədər dəmir yolu bağlantısının açılması mümkün olacaq. Onun fikrincə, bu, Ermənistan-İran ticarət-iqtisadi əlaqələrini genişləndirəcək və İranın regional tranzit imkanlarını artıracaq. “TASS”ın məlumatına görə, Paşinyan layihənin İranın da maraqlarına uyğun olduğunu vurğulayıb.
Paşinyan eyni brifinqdə Rusiya federal kanalında yayımlanan və ATƏT-in Baş katibi Feridun Sinirlioğlu ilə bağlı qalmaqala səbəb olan reportaja da münasibət bildirib. Reportajda rusiyalı prankerlər Vovan və Leksusun guya Paşinyanın adından Sinirlioğlu ilə danışdığı, söhbətdə bütün ermənilərin katolikosu II Qareginin vəzifədən uzaqlaşdırılması məsələsinin müzakirə edildiyi iddia olunurdu. “News.am” yazır ki, Paşinyan bu mövzunun Ermənistan hakimiyyətinin gündəmində olduğunu tamamilə təkzib edib.
Paşinyan məsələnin Sinirlioğlunun türk əsilli olması üzərindən emosional təqdim edilməsini də tənqid edib. O bildirib ki, “türk, gürcü, rus və ya erməni” olmasının fərqi yoxdur və bu tip başlıqlar Ermənistanda əlavə emosiyalar yaratmağa xidmət edir. “News.am” Paşinyanın bu qalmaqalı “xaricdən sırınan diskurs” kimi qiymətləndirdiyini və bunun Ermənistanın suverenliyinə zərər verdiyini yazıb.
