Ermənistanın baş naziri Nikol Paşinyan bildirib ki, TRIPP layihəsinin inkişafı ilə paralel olaraq yaxın gələcəkdə Ermənistan–Türkiyə sərhədinin açılmasını, həmçinin Ermənistan–Azərbaycan və Ermənistan–Türkiyə arasında dəmir yolu əlaqələrinin bərpasını gözləyirlər.
MSNews.az xəbər verir ki, Paşinyan bu barədə oktyabrın 6-da İrəvanda keçirilən Ermənistan–Böyük Britaniya Biznes Forumunda çıxışı zamanı danışıb.
Baş nazirin sözlərinə görə, Ermənistan və bütövlükdə region hazırda Azərbaycanla Ermənistan arasında formalaşmış sülh mühiti və bunun yaratdığı yeni iqtisadi imkanlarla əlaqədar transformasiya mərhələsindədir. O bildirib ki, Ermənistan hökuməti TRIPP layihəsinin praktiki icrasına başlamaq üçün gündəlik əsasda iş aparır.
Paşinyan vurğulayıb ki, layihənin həyata keçirilməsi təkcə Ermənistanın deyil, bütün regionun iqtisadi və nəqliyyat mühitinə təsir göstərə bilər.
Onun sözlərinə görə, TRIPP çərçivəsində Ermənistanla Azərbaycan arasında birbaşa dəmir yolu əlaqəsinin yaradılması nəzərdə tutulur. Bununla paralel olaraq Ermənistan–Türkiyə sərhədinin və dəmir yolu xəttinin açılması da gözlənilir.
Paşinyan həmçinin qeyd edib ki, regional kommunikasiyaların açılması Fars körfəzi ilə Qara dəniz arasında dəmir yolu bağlantısının yaradılmasına imkan verəcək. Ermənistan hökumətinin əvvəlki rəsmi açıqlamasında bu marşrutun İran, Naxçıvan, Ermənistan və Gürcüstan üzərindən formalaşa biləcəyi göstərilib.
Baş nazirin sözlərinə görə, Ermənistan ətrafında artıq müəyyən investisiya fəallığı müşahidə olunur və TRIPP-in reallaşdırılması yeni layihələrə, sərmayələrin artmasına və regionun investisiya cəlbediciliyinin yüksəlməsinə təkan verə bilər.
Paşinyan daha əvvəl də BMT Baş Assambleyasında çıxışı zamanı Ermənistan–Türkiyə dəmir yolunun açılmasını gözlədiklərini və bunun TRIPP ilə birlikdə Çin, Mərkəzi Asiya, Türkiyə və Avropa İttifaqını birləşdirən yeni logistika xəttinin yaranmasına şərait yaradacağını bildirmişdi.
