MSNews.az xəbər verir ki, Ukrayna Silahlı Qüvvələrinin Baş Qərargahı hər iki müəssisəyə zərbələrin endirildiyini və ərazilərdə yanğınların başladığını açıqlayıb. Rusiya tərəfi isə Afipski zavodundakı yanğının vurulan dronların qalıqlarının düşməsi nəticəsində yarandığını bildirib. Hücumların dəqiq nəticələri barədə tərəflərin açıqlamaları tam üst-üstə düşmür.
Başqırdıstan rəhbəri Radiy Xabirovun sözlərinə görə, “Qazprom Neftexim Salavat”ın əsas istehsal qurğuları zərər görməyib. Kommunikasiya estakadalarında, təchizat xətlərində və elektrik kabellərində müəyyən zədələrin qeydə alındığı, bərpa işlərinin fasiləsiz aparıldığı bildirilib. Xabirov müəssisənin bir neçə gün ərzində normal istehsal gücünə qayıdacağını gözlədiyini deyib.
İnterfaks Başqırdıstandakı sənaye müəssisəsində yaranan yanğının söndürüldüyünü bildirib. Hücum zamanı ölən və yaralananların olmadığı açıqlanıb.
“Reuters” agentliyinin məlumatına görə, “Qazprom”a məxsus Salavat kompleksi Rusiyanın neft emalı gücünün təxminən 2,7 faizini təşkil edir. Müəssisə benzin, dizel, kerosin, mazut, mayeləşdirilmiş qaz və müxtəlif neft-kimya məhsulları istehsal edir.
Krasnodar diyarının Əməliyyat Qərargahı Afipski Neft Emalı Zavodunda yaranan yanğının da söndürüldüyünü açıqlayıb. Regionda dron qalıqlarının Afipski qəsəbəsi, Smolenskaya stanitsası və Kovalenko yaşayış məntəqəsində ümumilikdə 16 ünvana düşdüyü bildirilib. Son məlumatlara əsasən, iki nəfər xəsarət alıb, yaşayış evləri və nəqliyyat vasitələrinə ziyan dəyib.
Afipski zavodunun istehsal qurğularına dəyən zərərin miqyası və müəssisənin fəaliyyətinin dayanıb-dayanmadığı barədə Rusiya tərəfi ətraflı məlumat verməyib. Ukrayna Baş Qərargahına istinad edən Hromadske zavodun illik layihə gücünün təxminən 6,25 milyon ton neft olduğunu yazıb.
Rusiya Müdafiə Nazirliyi gecə ərzində ölkənin müxtəlif bölgələri, ilhaq edilmiş Krım, Azov və Qara dəniz üzərində ümumilikdə 288 Ukrayna tipli pilotsuz uçuş aparatının vurulduğunu iddia edib. Bu rəqəm yalnız Salavat və Afipski zavodlarına yönələn dronların sayını deyil, genişmiqyaslı gecə hücumunun ümumi göstəricisini əks etdirir. Məlumat müstəqil şəkildə təsdiqlənməyib.
