Pakistanın sabiq Baş naziri və Pakistan Ədalət Partiyasının (PTI) qurucusu İmran Xan ilə həyat yoldaşı Büşra Bibi korrupsiya işi üzrə 17 il həbs cəzasına məhkum ediliblər.
“Dawn” qəzetinin məlumatına görə, hökm 2021-ci ildə rəsmi səfər zamanı Səudiyyə Ərəbistanının Vəliəhd Şahzadəsi Məhəmməd bin Salman tərəfindən hədiyyə edilən zinət əşyalarının dövlətin “Toşaxana” (Toshakhana) departamentindən real dəyərindən xeyli aşağı qiymətə alınması ilə bağlı iş üzrə verilib.
Məhkəmənin qərarına əsasən, İmran Xan və Büşra Bibi təxminən 59 min ABŞ dolları (16,4 milyon rupi) məbləğində cərimə də ödəməlidirlər.
Hökm, İmran Xanın saxlanıldığı Ravalpindi şəhərindəki Adiala həbsxanasında keçirilən iclasda Xüsusi Məhkəmə hakimi Central Şahrux Arcumand tərəfindən elan edilib.
Pakistanın İnformasiya naziri Attaullah Tarar bildirib ki, bu iş üzrə verilən həbs cəzası İmran Xanın 190 milyon funt sterlinqlik başqa bir korrupsiya işi üzrə cəzası başa çatdıqdan sonra icra olunmağa başlayacaq.
“Toşaxana” nədir?
Pakistan qanunvericiliyinə əsasən, baş nazirlər, nazirlər, yüksək vəzifəli dövlət məmurları və bürokratlar xarici dövlət rəhbərlərindən aldıqları hədiyyələri “Toşaxana” adlı xüsusi departamentə bildirməyə borcludurlar. Bu hədiyyələr əvvəlcə dövlətə təhvil verilir, daha sonra rəsmi şəxslər onları müəyyən qaydalar çərçivəsində satın ala bilirlər.
İstintaq zamanı iddia olunub ki, təxminən 285 min dollar (80 milyon rupi) dəyərində olan zinət əşyaları cəmi 10 min dollar (2,9 milyon rupi) qarşılığında əldə edilib.
İmran Xan və Büşra Bibi ittihamları rədd edərək, məhkəmə prosesini “siyasi məqsədli və onu siyasətdən uzaqlaşdırmaq üçün qurulmuş plan” adlandırıblar.
İmran Xan 2022-ci ilin aprelində parlamentdə etimad səsverməsini itirərək vəzifədən uzaqlaşdırılmışdı. O, 9 may 2023-cü ildə İslamabadda paramilitar qüvvələr tərəfindən saxlanılmışdı.
Onun Milli Hesabatlılıq Bürosu (NAB) tərəfindən həbsindən sonra ölkə üzrə genişmiqyaslı etirazlar başlamış, İslamabad, Ravalpindi, Lahor, Karaçi və Peşəvər də daxil olmaqla bir çox şəhərlərdə aksiyalar keçirilmişdi. Qarşıdurmalar zamanı 9 nəfər həyatını itirmiş, 290-dan çox şəxs yaralanmışdı.
İmran Xan 12 may 2023-cü ildə məhkəmə qərarı ilə müvəqqəti azadlığa buraxılsa da, 5 avqust 2023-cü ildə yenidən həbs edilərək həbsxanaya göndərilib və o vaxtdan bəri müxtəlif işlər üzrə cəzalarını çəkməkdədir.
