Mərakeş millisi 2026-cı il dünya çempionatının 1/16 final mərhələsində Niderlandı turnirdən kənarlaşdırıb.
MSNews.az xəbər verir ki, “Monterrey Stadium”-da keçirilən qarşılaşmanın əsas və əlavə vaxtı 1:1 hesabı ilə başa çatıb. Penaltilər seriyasında isə Mərakeş 3:2 hesabı ilə qalib gələrək 1/8 finala yüksəlib.
Niderland 72-ci dəqiqədə Kodi Qakponun qolu ilə önə keçib. Lakin Mərakeş oyundan qopmayıb və əlavə olunmuş vaxtda hesabı bərabərləşdirib.
90+1-ci dəqiqədə İssa Diop baş zərbəsi ilə fərqlənərək Afrika təmsilçisini yenidən oyuna qaytarıb. Bu qol qarşılaşmanın əlavə vaxta getməsinə səbəb olub.
Əlavə vaxtda qapılar toxunulmaz qalıb və qalib penaltilər seriyasında müəyyənləşib. Gərgin seriyada hər iki komanda bir neçə zərbədən yararlana bilməyib.
Mərakeş qapıçısı Yassin Bunu Kryiensio Sammervilinin zərbəsini dəf edərək komandasına üstünlük qazandırıb. Həlledici penaltini İsmael Saibari dəqiq yerinə yetirib və Mərakeşə tarixi qələbə qazandırıb.
Penaltilər seriyasında Niderlanddan Castin Klayvert və Kvinten Timber dəqiq ola bilməyib. Mərakeşdə isə Aşraf Hakimi və Neil Əl Aynaui şansını boşa verib, lakin Saibarinin son zərbəsi komandanı növbəti mərhələyə daşıyıb.
Mərakeş oyunun böyük hissəsində daha fəal tərəf kimi görünıb. Komanda həm əsas vaxtda, həm də əlavə vaxtda Niderland müdafiəsinə ciddi təzyiq göstərib. Niderland isə üstünlüyü qorumağa çalışsa da, son dəqiqələrdə buraxılan qol komandanın planlarını pozub.
Ronald Kumanın komandası üçün bu nəticə böyük məyusluq olub. Niderland mundiala yüksək ambisiyalarla gəlsə də, pley-offun ilk mərhələsində mübarizəni dayandırıb.
Mərakeş isə 2022-ci il dünya çempionatında yarımfinala qədər irəliləyən komanda kimi yenidən böyük turnir xarakterini göstərib. Mohamed Ouahbinin komandası növbəti mərhələdə Kanada ilə qarşılaşacaq.
Mərakeş – Kanada oyunu iyulun 4-də Hyustonda keçiriləcək.
