ABŞ-nin Mayami şəhərində keçirilən danışıqlarda Vaşinqton nümayəndələri Ukraynadan Rusiyanın neft emalı zavodlarına hücumları dayandırmağı tələb ediblər. Ukrayna tərəfi bunun müqabilində hansı güzəştlərin ediləcəyini soruşduqda isə amerikalılar Kiyevə onsuz da kifayət qədər dəstək göstərildiyini bildiriblər.
MSNews.az xəbər verir ki, ABŞ və Ukrayna nümayəndələri arasında aparılan danışıqların təfərrüatları Amerika mediasında geniş müzakirə olunur.
“Axios” nəşrinin məlumatına görə, Prezident Donald Trampın xüsusi nümayəndəsi Stiv Uitkoff və kürəkəni Cared Kuşner Mayamidə Ukrayna nümayəndə heyətinə Rusiyanın neft emalı zavodlarına zərbələrin dayandırılmasının vacibliyini çatdırıblar.
Danışıqlarda ən ciddi fikir ayrılıqlarından biri hücumların qarşılıqlı şəkildə dayandırılması məsələsi olub.
Ukrayna nümayəndələri Rusiyanın da Ukraynadakı elektrik stansiyalarına və digər enerji obyektlərinə hücumları dayandırmasını istəyiblər. Lakin ABŞ tərəfi Kiyevin ilk addımı qarşılıq gözləmədən atmalı olduğunu bildirib.
“Axios”un danışdığı ABŞ rəsmisi Vaşinqtonun Ukraynaya silah-sursat və kəşfiyyat məlumatları təqdim etdiyini xatırladaraq, Kiyevin Amerika istehlakçılarına zərər verən addımlardan çəkinməli olduğunu vurğulayıb.
Ukrayna rəsmilərindən biri isə danışıqlarda ABŞ-nin kəşfiyyat məlumatlarının paylaşılmasını dayandıra biləcəyi barədə xəbərdarlıq edildiyini iddia edib. Amerika tərəfi belə bir təhdidin səsləndirildiyini təkzib edib.
Danışıqların müddəti ilə bağlı məlumatlarda fərqlilik var. Təqdim olunan ilkin məlumatda görüşün altı saat davam etdiyi bildirilir. “Axios” isə Mayamidəki danışıqların səkkiz saat çəkdiyini yazıb.
Stiv Uitkoffun Tramp və Putin arasındakı telefon danışığında iştirak etmək üçün görüş zalını tərk etməsi barədə iddia da yayılıb. Lakin bu konkret epizodun təfərrüatlarını müstəqil mənbələr vasitəsilə təsdiqləmək mümkün olmayıb.
“Reuters” agentliyinin məlumatına görə, Vaşinqton Rusiya dizelinin ixracına dair razılaşmanın Moskvanın sülh danışıqlarında mövqeyini yumşaldacağına ümid edir. Bununla belə, Ukrayna tərəfi Rusiyadan qarşılıqlı öhdəlik olmadan neft obyektlərinə hücumların dayandırılmasına razılıq verməyib.
