Türkiyə Səudiyyə Ərəbistanına hərbi yardım göstərmək və bu ölkəyə qoşun göndərmək imkanlarını nəzərdən keçirir. Lakin belə bir addımın atılması üçün Türkiyə Böyük Millət Məclisinin razılığı tələb olunur.
MSNews.az xəbər verir ki, bu barədə Türkiyə Milli Müdafiə Nazirliyi oktyabrın 15-də keçirilən həftəlik brifinqdə açıqlama verib.
“Hürriyet Daily News” nəşrinin məlumatına görə, nazirlik Türkiyə, Səudiyyə Ərəbistanı və Pakistan arasında imzalanmış Məkkə Birgə Müdafiə Sazişi çərçivəsində Ər-Riyada göstərilə biləcək hərbi dəstəyin ölkə Konstitusiyasına və mövcud qanunvericiliyə uyğun həyata keçiriləcəyini bildirib.
Qeyd olunub ki, Türkiyənin Səudiyyə Ərəbistanına hərbi qüvvələr və müdafiə vasitələri göndərməsi ilə bağlı proses parlamentin təsdiqindən sonra irəliləyə bilər. Yardımın konkret həcmi, xarakteri və mümkün dislokasiya barədə isə hələlik yekun qərar qəbul edilməyib.
Üç ölkə arasında müdafiə sazişi avqustun 7-də imzalanıb. Razılaşmaya əsasən, iştirakçı dövlətlərdən birinə silahlı hücum hamısına qarşı hücum kimi qiymətləndirilir. Bununla yanaşı, tərəflərin göstərəcəyi yardım təhlükənin xarakterindən və müvafiq qərarlardan asılıdır.
Türkiyə Prezidenti Rəcəb Tayyib Ərdoğan oktyabrın 12-də sazişin təsdiqlənməsi üçün yaxın günlərdə parlamentə təqdim ediləcəyini açıqlayıb. “Reuters” agentliyinin məlumatına görə, Ərdoğan Yəməndəki husilərin Səudiyyə Ərəbistanına hücumlarını pisləyərək Ər-Riyadla həmrəyliyini ifadə edib.
Türkiyənin xarici işlər naziri Hakan Fidan isə ölkəsinin Səudiyyə Ərəbistanına müdafiə xarakterli yardım göstərməyə hazır olduğunu, lakin hücum əməliyyatlarında iştirak etməyi planlaşdırmadığını bildirib. Mümkün dəstək istiqamətləri arasında hava hücumundan müdafiə, elektron müharibə və texniki yardım yer alır.
