2026-cı il futbol üzrə DÇ-nın finalında turnir tarixində ilk dəfə xüsusi fasilə şousu təşkil olunacaq. Məlumata görə, şounun əsas iştirakçıları Madonna, Şakira və BTS olacaq. Final oyunu iyulun 19-da ABŞ-ın Nyu-Cersi ştatındakı MetLife Stadiumda keçiriləcək.
MSNews.az məlumatı “The Guardian” nəşrinə istinadən verir.
Şou “Global Citizen” tərəfindən hazırlanacaq, proqramın kuratoru isə “Coldplay” qrupunun solisti Kris Martin olacaq. Layihə FIFA Global Citizen Education Fund təşəbbüsünə dəstək məqsədi daşıyır. Bu fond dünyada uşaqlar üçün keyfiyyətli təhsilə və futbola çıxış imkanlarını genişləndirməyi hədəfləyir.
Fasilə şousunun ümumi müddətinin cəmi 11 dəqiqə olacağı bildirilir. Bu, çıxışların çox qısa və sıx formatda hazırlanacağını göstərir.
Şakiranın adı DÇ-2026 ilə daha əvvəl də gündəmə gəlmişdi. O, Burna Boy ilə birlikdə mundial üçün “Dai Dai” adlı yeni rəsmi mahnı hazırlayıb. Kolumbiyalı müğənni 2010-cu il dünya çempionatının məşhur “Waka Waka” mahnısı ilə də futbol azarkeşlərinin yaddaşında qalıb.
FIFA prezidenti Canni İnfantino daha əvvəl dünya çempionatının finalında ilk dəfə fasilə şousu keçiriləcəyini açıqlamışdı. Bu addım Super Bowl formatına bənzər böyük musiqili performansın mundial finalına gətirilməsi kimi qiymətləndirilir. Bununla belə, bəzi azarkeşlər futbol finalında fasilənin uzadılması ehtimalına görə narahatlıq ifadə edirlər.
