ABŞ rəhbərliyi altında NATO müttəfiqləri avqustun 18-də Rusiyanın Kalininqrad vilayəti yaxınlığında genişmiqyaslı hava fəaliyyəti həyata keçirib. Açıq mənbələrdən əldə edilən məlumatlara görə, əməliyyatda təxminən 25 hərbi təyyarə və helikopter iştirak edib.
MSNews.az xəbər verir ki, “The War Zone” Polşa hərbi rəsmisinə istinadən əməliyyat zamanı ABŞ-nin EA-37B Compass Call elektron müharibə təyyarəsinin, NATO-nun E-3 AWACS erkən xəbərdarlıq və idarəetmə təyyarəsinin və ARTEMIS II kəşfiyyat platformasının Kalininqrad yaxınlığında fəaliyyət göstərdiyini yazıb. ABŞ və Norveç qırıcıları da əməliyyata cəlb olunub.
EA-37B-nin bölgədə görünməsi xüsusi diqqət çəkib. ABŞ Hərbi Hava Qüvvələrinin nisbətən yeni və azsaylı elektron müharibə platformalarından olan təyyarə əməliyyat üçün Yunanıstandan Polşanın Povidz bazasına gətirilib. Təyyarə elektron rabitə və radar sistemlərinə qarşı fəaliyyət, həmçinin elektromaqnit mühitinin öyrənilməsi üçün nəzərdə tutulub. Bununla belə, NATO konkret uçuş zamanı hansı elektron sistemlərin izlənildiyini açıqlamayıb.
“Anadolu Agentliyi”nin məlumatına görə, açıq uçuş izləmə məlumatlarında ABŞ və Norveç qırıcıları ilə yanaşı, yanacaqdoldurma təyyarələri və digər dəstək vasitələri də qeydə alınıb. AirNav Radar məlumatlarında ABŞ-nin AH-64E Apache zərbə helikopterləri, Polşanın Gulfstream G550 təyyarələri və Airbus A330 MRTT hava tankerləri də görünür. Təyyarələrin ümumi sayı ilə bağlı NATO rəsmi rəqəm açıqlamayıb; açıq mənbə hesablamalarında təxminən 25, bəzi məlumatlarda isə daha çox hava vasitəsindən bəhs olunur.
NATO-nun Avropadakı Ali Müttəfiq Qüvvələr Komandanlığının sözçüsü Martin O’Donnell “Wirtualna Polska”ya bildirib ki, avqustun 18-də Baltik regionunda ABŞ və Norveç qırıcılarının, Polşa quru qüvvələrinin və NATO AWACS sisteminin iştirakı ilə keçirilən fəaliyyət müttəfiqlərin müdafiə imkanlarını təkmilləşdirməsinin bir hissəsidir. Əməliyyatın ABŞ tərəfindən idarə edildiyi, əlavə detalların isə əməliyyat təhlükəsizliyi səbəbindən açıqlanmadığı bildirilib.
Polşa komandanlığı da fəaliyyətin Rusiyanın həmin gün atdığı konkret hərbi addıma cavab olmadığını, əvvəlcədən planlaşdırıldığını və müttəfiq qüvvələr arasında qarşılıqlı fəaliyyətin gücləndirilməsinə xidmət etdiyini bildirib. “Anadolu Agentliyi”nin məlumatına görə, təlim birgə hava əməliyyatları ssenarilərinin məşq etdirilməsinə yönəlib.
Kalininqrad ətrafındakı intensiv hava fəaliyyəti ilk olaraq hərbi uçuşları izləyən OSINT mənbələri tərəfindən qeydə alınıb. Sonradan NATO rəsmiləri əməliyyatın keçirildiyini təsdiqləyiblər. “RMF24” avqustun 19-da oxşar hava fəaliyyətinin ikinci gün də davam etdiyini bildirib.
Kalininqrad Polşa və Litva arasında yerləşən, Rusiyanın əsas ərazisindən ayrı düşmüş və yüksək səviyyədə hərbiləşdirilmiş eksklavıdır. Bölgədə Rusiya hava hücumundan müdafiə, raket və digər hərbi sistemlər saxlayır və buna görə də ərazi NATO-nun şərq cinahının təhlükəsizliyi baxımından strateji əhəmiyyət daşıyır.
