İsveçdə keçiriləcək parlament seçkiləri ərəfəsində sorğuların lideri olan Sosial Demokrat Partiyası ərəb dilində də seçki kampaniyası aparır.
MSNews.az xəbər verir ki, Magdalena Anderssonun rəhbərlik etdiyi partiyanın rəsmi saytında 2026-cı il seçkiləri üçün ərəb dilində ayrıca kampaniya səhifəsi yaradılıb. Burada seçicilərə partiyanın proqramı, əsas vədləri, səsvermə qaydaları və sentyabrın 13-də keçiriləcək seçkilər barədə məlumat verilir. Sosial Demokratların materialları ərəb dili ilə yanaşı fars, türk, somali, kürd, bosniya və bir sıra digər dillərdə də yayımlanır.
Ərəb dilində seçki reklamlarının İsveçdə yaşayan ərəbdilli seçicilərə yönəldildiyi bildirilir. İsveç mediasının məlumatına görə, Sosial Demokratların rəqəmsal reklamlarında Anderssonun fotosu ilə yanaşı ailələrin maliyyə vəziyyətinin yaxşılaşdırılması, səhiyyə və təhsil kimi mövzular ön plana çıxarılır.
Partiya hazırda seçki yarışının da favoritidir. “Reuters” Verian-ın avqustun 3-16-da keçirdiyi sorğuya istinadən Sosial Demokratların 30,5% dəstəklə İsveçin ən böyük partiyası olduğunu bildirib. Ümumilikdə sol-mərkəz müxalifət bloku 53,9%, Baş nazir Ulf Kristerssonun sağ bloku isə 43,9% dəstək alıb.
İsveç Statistika İdarəsinin — SCB-nin son tamillik məlumatları ölkənin demoqrafik strukturunda xarici mənşəli əhalinin payının yüksək olduğunu göstərir. 2025-ci ilin sonunda 2,94 milyon nəfər, yaxud əhalinin 27,7%-i “xarici mənşəli” kateqoriyasına daxil olub. Bu anlayış həm xaricdə doğulanları, həm də İsveçdə doğulub hər iki valideyni xaricdə doğulan şəxsləri əhatə edir. Buna görə həmin 28%-i bütövlükdə “miqrantlar” adlandırmaq statistik baxımdan dəqiq deyil. Xaricdə doğulanların özlərinin payı isə 20,8% təşkil edib.
SCB məlumatlarında Suriya və İraq İsveçə miqrasiya baxımından mühüm mənşə ölkələri sırasında yer alsa da, 2,94 milyon nəfərlik göstərici yalnız bu ölkələrdən gələnlərə deyil, bütün xarici mənşəli əhaliyə aiddir.
İsveçdə parlament seçkiləri 13 sentyabr 2026-cı ildə keçiriləcək. Son sorğular Sosial Demokratların birinci yerdə qaldığını, lakin hakim sağ blokla müxalifət arasındakı fərqin avqustun sonuna doğru müəyyən qədər azaldığını göstərir. “Reuters” Ipsos-un son sorğusunda sol-mərkəz blokunun dəstəyi 52,4%, hakim blokun dəstəyi isə 45,6% göstərilib.
