İsrailin sefard baş ravvini David Yosef Qəzza və İordan çayının işğal altındakı Qərb sahilinin bir sıra şəhərləri ilə bağlı sərt açıqlamalar verərək, bu ərazilərin İsrailə məxsus olduğunu iddia edib və fələstinlilərin hüquqlarını rədd edib.
MSNews.az xəbər verir ki, Yosef bu fikirləri avqustun 20-də Qüdsdəki Qush Katif Muzeyinə səfəri zamanı səsləndirib. İsrailin dini yönümlü “Shtetel” nəşrinin yaydığı məlumata görə, ravvin Qəzza ilə yanaşı Şxem — indiki Nablus və Cenin şəhərlərini də nəzərdə tutaraq onların “bizim” olduğunu bildirib.
Yosef daha sonra fələstinliləri ayrıca xalq kimi qəbul etmədiyini deyərək onların hüquqlarının olmadığını iddia edib. “Middle East Eye” də onun çıxışında “Fələstin xalqı deyilən bir şey yoxdur” məzmunlu fikirlər səsləndirdiyini bildirib.
Baş ravvin 2005-ci ildə İsrailin Qəzzadan çıxmasından sonra Qush Katifdə qalan sinaqoqların dağıdılmasına toxunaraq Qəzzanın məhv edilməsini və israillilərin ora geri qayıtmasını arzuladığını da deyib. İsrail mediasında yayılan çıxışda bu fikir dini ifadələrlə təqdim olunub.
ABŞ-da fəaliyyət göstərən Amerika-İslam Münasibətləri Şurası — CAIR açıqlamaları kəskin tənqid edib. Təşkilat Yosefin fələstinlilərin mövcudluğunu və hüquqlarını rədd edən fikirlərini “nifrət dolu ritorika” adlandırıb.
David Yosef İsrailin iki rəsmi baş ravvinindən biridir və sefard icmasını təmsil edən Rişon LeZion titulunu daşıyır. İsrail hökumətinin rəsmi sənədlərində o, həmçinin Böyük Ravvin Məhkəməsinin sədri kimi göstərilir. Yosef bu vəzifəyə 2024-cü ildə seçilib.
Qeyd edək ki, Yosefin ərazilərlə bağlı söylədikləri onun dini-siyasi mövqeyidir və İsrail hökumətinin yeni rəsmi ərazi qərarı kimi təqdim edilmir.
