İsrailin “Discover-Tech” reklam texnologiyaları şirkətinin internet reklamlarından istifadə edərək dünya miqyasında genişmiqyaslı izləmə fəaliyyəti həyata keçirdiyi və bəzi cihazların casus proqramları ilə yoluxdurulmasına şərait yaratdığı üzə çıxıb.
MSNews.az xəbər verir ki, bu barədə Kanadanın “Citizen Lab” tədqiqat mərkəzi və ABŞ-nin “Confiant” kibertəhlükəsizlik şirkətinin oktyabrın 15-də dərc etdiyi araşdırmalarda bildirilib.
Məlumatı “Reuters” agentliyi yayıb.
Ən diqqətçəkən məqam isə bəzi hücumların istifadəçinin heç bir hərəkəti olmadan həyata keçirilməsidir. “Zero-click” adlandırılan bu üsulda zərərli reklamın yüklənməsi kifayət edə bilər və istifadəçinin hər hansı keçidə daxil olmasına ehtiyac qalmır.
Tədqiqatçılar müəyyən ediblər ki, “Discover-Tech”-in reklam infrastrukturu ABŞ-nin sanksiya siyahısına daxil edilmiş İsrailin Candiru casus proqramı istehsalçısına da xidmət göstərib.
“Citizen Lab” 2024–2025-ci illərdə “Al Jazeera” media şəbəkəsinə məxsus azı 45 cihazın Candiru casus proqramı ilə hədəf alındığını və yoluxdurulduğunu müəyyən edib. Araşdırma jurnalistlərin təqdim etdiyi şəbəkə qeydləri əsasında aparılıb.
Araşdırmadan sonra “Google” “Discover-Tech”-in reklam platformalarına çıxışını dayandırıb. Avropanın reklam sənayesi təşkilatı IAB Europe də şirkəti təsdiqlənmiş təchizatçılar siyahısından çıxarıb.
