Ermənistanın Baş naziri Nikol Paşinyan avqustun 8-də Azərbaycan Prezidenti İlham Əliyevə zəng edib. Telefon danışığında Azərbaycan-Ermənistan sülh prosesi, iqtisadi əməkdaşlıq və TRIPP marşrutunun icrası müzakirə olunub.
MSNews.az xəbər verir ki, Azərbaycan Prezidentinin Mətbuat Xidmətinin məlumatına görə, tərəflər ABŞ Prezidenti Donald Trampın dəstəyi ilə 2025-ci il avqustun 8-də Vaşinqtonda keçirilmiş Sülh Sammitinin birinci ildönümü və Azərbaycanla Ermənistan arasında Sülh Sazişinin razılaşdırılmış mətninin paraflanmasını xatırladıblar.
Liderlər ötən bir il ərzində iki ölkə arasında münasibətlərin normallaşdırılması istiqamətində əldə edilmiş irəliləyişi qeyd edib, Donald Trampın və ABŞ hökumətinin prosesdəki rolunu xüsusi vurğulayıblar.
Danışıq zamanı iqtisadi və ticari əlaqələrin inkişafı sülh prosesinin konkret nəticələrindən biri kimi qiymətləndirilib. Bu kontekstdə Azərbaycanın neft məhsullarının Ermənistana ixracı, eləcə də tranzit yüklərin Azərbaycan ərazisindən Ermənistana və Ermənistandan digər istiqamətlərə daşınması qeyd olunub.
İlham Əliyev və Nikol Paşinyan Vaşinqton razılaşmalarına uyğun olaraq TRIPP – “Beynəlxalq Sülh və Rifah naminə Tramp Marşrutu” layihəsinin icrası ilə bağlı da fikir mübadiləsi aparıblar. 2025-ci ildə imzalanmış üçtərəfli bəyannamədə Ermənistanın ABŞ və qarşılıqlı razılaşdırılmış tərəfdaşlarla birlikdə TRIPP layihəsinin öz ərazisində həyata keçirilməsi üçün çərçivə formalaşdıracağı nəzərdə tutulub.
Tərəflər regionda davamlı sülhün və sabitliyin möhkəmləndirilməsi, nəqliyyat bağlantılarının genişləndirilməsi və iqtisadi əməkdaşlığın inkişafı istiqamətində səylərin davam etdirilməsinin vacibliyini vurğulayıblar.
Qeyd edək ki, 2025-ci il avqustun 8-də Vaşinqtonda Azərbaycan və Ermənistan xarici işlər nazirləri Sülh və Dövlətlərarası Münasibətlərin Təsis Edilməsi haqqında Sazişin razılaşdırılmış mətnini paraflayıblar. Həmin vaxt tərəflər sənədin gələcəkdə imzalanması və ratifikasiyası üçün əlavə addımların zəruri olduğunu da bəyan ediblər.
