Siyasi araşdırmaçı Pərviz Əliyevin fikrincə, ABŞ-İran qarşıdurmasını yalnız nüvə proqramı ilə izah etmək düzgün deyil. O hesab edir ki, nüvə məsələsi daha dərin geosiyasi proseslərin görünən tərəfidir.
“Məsələ nüvə deyil. Nüvə silahı mövzusu baş verənləri ictimaiyyətə əsaslandırmaq üçün istifadə olunan bəhanədir. Əsl səbəblər daha dərindir və qlobal güc balansı ilə bağlıdır”, — deyə Əliyev bildirib.
Onun sözlərinə görə, ABŞ-İran danışıqları 1979-cu ildən bəri müxtəlif formalarda davam etsə də, Vaşinqton indiki qədər zəif mövqedə görünməyib. Araşdırmaçı qeyd edir ki, mümkün sazişdə sanksiyaların ləğvi, İranın aktivlərinin blokdan çıxarılması, investisiyalar və Tehranın daxili işlərinə müdaxilə edilməməsi kimi şərtlər yer alarsa, bu, ABŞ üçün ciddi siyasi geri çəkilmə kimi qiymətləndirilə bilər.
“Əgər razılaşma bu formada imzalanarsa, bu, ABŞ-ın faktiki təslimiyyəti və Tramp üçün ciddi uğursuzluq olacaq. Fevralın əvvəlində Vaşinqtonun gözləntisi qətiyyən bu deyildi”, — Pərviz Əliyev vurğulayıb.
Siyasi araşdırmaçı hesab edir ki, Yaxın Şərqdəki proseslər yalnız regional qarşıdurma deyil, daha geniş geosiyasi rəqabətin tərkib hissəsidir. Onun fikrincə, ABŞ qlobal dominantlığının zəifləməsi fonunda Çin kimi yeni güc mərkəzlərinin yüksəlişinin qarşısını almağa çalışır.
“Vaşinqton mövcud beynəlxalq münasibətlər sistemini qorumağa və alternativ dünya nizamının formalaşmasına mane olmağa çalışır. İran ətrafında baş verənlər də məhz bu böyük qarşıdurmanın bir hissəsi kimi oxunmalıdır”, — deyə Əliyev əlavə edib.
