“Apple” materik Çin bazarı üçün özünə məxsus böyük dil modeli (LLM) hazırlayıb. Model “Alibaba Group”un texniki dəstəyi ilə öyrədilib və şirkətin Çində “Apple Intelligence” xidmətlərini istifadəyə vermək üçün formalaşdırdığı yeni strategiyanın bir hissəsidir.
Bu barədə “Reuters” üç məlumatlı mənbəyə istinadən xəbər verib.
MSNews.az xəbər verir ki, bu addım “Apple”ın əvvəlki yanaşmasından ciddi şəkildə fərqlənir. Şirkət indiyədək Çində süni intellekt funksiyalarını əsasən yerli tərəfdaşların modelləri vasitəsilə təqdim etməyi planlaşdırırdı. Yeni xüsusi model isə “Apple”a Çin bazarında süni intellekt funksiyaları və istifadəçi təcrübəsi üzərində daha çox nəzarət imkanı verə bilər.
“Apple Intelligence”-in Çində qarşıdakı aylarda əməliyyat sistemi yeniləməsindən sonra istifadəyə verilməsi gözlənilir. Çin versiyasında “Alibaba”nın “Qwen” modelinin iPhone, iPad, Mac və Vision Pro cihazlarındakı “Apple Intelligence” sisteminə inteqrasiyası nəzərdə tutulur. “Apple” eyni zamanda “Baidu” ilə də Çin istifadəçiləri üçün bəzi AI funksiyalarının hazırlanması üzərində işləyir.
Çində istehlakçılara təqdim edilən generativ süni intellekt xidmətləri əvvəlcədən dövlət qeydiyyatından keçməlidir. Ölkənin Kiberməkan Administrasiyası iyul ayında “Apple Intelligence”-i rəsmi olaraq qeydiyyata alıb və bununla xidmətin Çin cihazlarında istifadəyə verilməsi üçün əsas tənzimləyici maneələrdən biri aradan qalxıb. Bununla belə, dəqiq təqdimat tarixi açıqlanmayıb.
Çin üçün ayrıca modelin hazırlanmasının səbəblərindən biri də ABŞ mənşəli qabaqcıl AI sistemlərinin ölkədə məhdud olmasıdır. “Reuters” qeyd edir ki, “Apple” digər bazarlarda öz texnologiyasını “OpenAI”ın ChatGPT-si və “Anthropic”in Claude-u kimi sistemlərlə birləşdirə bilir, lakin bu xidmətlər Çində eyni formada əlçatan deyil.
“Apple” və “Alibaba” arasında əməkdaşlıq ilk dəfə 2025-ci ilin fevralında rəsmən təsdiqlənmişdi. “Alibaba”nın sədri Co Tsay həmin vaxt “Apple”ın bir neçə Çin şirkəti ilə danışıqlardan sonra məhz “Alibaba”nı seçdiyini bildirmişdi.
Yeni strategiya “Apple” üçün kommersiya baxımından da əhəmiyyətlidir. Şirkət Çin smartfon bazarında “Huawei” və digər yerli istehsalçıların AI funksiyalarını sürətlə genişləndirməsi fonunda güclü rəqabətlə üzləşib. “Reuters”in məlumatına görə, Apple Intelligence-in Çində indiyədək əlçatan olmaması iPhone-un yerli rəqiblərlə mübarizəsində əsas çatışmazlıqlardan biri hesab edilirdi.
“Apple”ın öz modelinin “Qwen” və “Baidu” texnologiyaları ilə konkret olaraq necə bölüşdürüləcəyi isə hələ açıqlanmır. “Reuters”ə görə, plan tam həyata keçirilərsə, “Apple” Çində özünə məxsus süni intellekt modelini təqdim etmək üçün Pekinin razılığını alan ilk xarici şirkət ola bilər.
