İngiltərədə daha bir polis qurumu Kral III Çarlzın qardaşı Endryu Mountbatten-Uindsor barəsində amerikalı milyarder Ceffri Epşteynlə əlaqələrə dair araşdırmaya başlayıb. Esseks polisinin açıqlamasına görə, qurumun səlahiyyət dairəsinə daxil olan Stansted Hava Limanına Epşteynə məxsus şəxsi təyyarə ilə edilən uçuşlar istintaq predmetidir.
Açıqlamada bildirilir ki, iddialara əsasən, həmin təyyarə Mountbatten-Uindsor ilə görüşləri təşkil edilən qadınları daşıyıb. Araşdırma çərçivəsində Stanstedə eniş edən təxminən 90 uçuşun Epşteynlə əlaqəli olduğu, bunlardan 15-nin onun 2008-ci ildə azyaşlını fahişəliyə məcbur etmə cinayətinə görə məhkum olunmasından sonra baş verdiyi qeyd olunur.
Esseks Polisi uçuş məlumatlarının və bu səfərlərlə bağlı elektron yazışmaların təhlil edildiyini, həmçinin keçmiş baş nazir Qordon Braunun, sözügedən uçuşlarla daşınan qadınlardan ən azı birinin Bukingem Sarayına getdiyinə dair bəyanatının da nəzərə alındığını bildirib.
Beləliklə, Esseks Polisi Temza Vadisi Polisi və Surrey Polisindən sonra Mountbatten-Uindsorla bağlı araşdırma aparan üçüncü polis qurumu olub. Bu yoxlamalar Epşteynin ABŞ-da azyaşlı qızlara qarşı fahişəlik şəbəkəsi qurmaq ittihamı ilə həbsdə olduğu dövrdə həbsxanada ölü tapılması ilə bağlı geniş araşdırmaların bir hissəsidir.
Mountbatten-Uindsorun Epşteynlə yaxın münasibətləri ABŞ Ədliyyə Nazirliyinin açıqladığı sənədlərdə yer alıb. Epşteynin qurbanlarından Virciniya Giuffr, 17 yaşında olarkən o dövrdə Şahzadə olan Endryu ilə cinsi əlaqəyə məcbur edildiyini iddia edib. İddiaları rədd edən Mountbatten-Uindsor Krallıq ailəsinə zərər vurmamaq üçün York hersoqu da daxil olmaqla bütün titullarından imtina etmişdi. Lakin ötən ilin sonunda artan ictimai təzyiqlər fonunda Kral III Çarlz onun “şahzadə” titulunu da geri almışdı.
Mountbatten-Uindsorun 2003-cü ildən yaşadığı Royal Lodge malikanəsi, illik simvolik kirayə haqqı və 75 illik istifadə hüququnun 1 milyon funt-sterlinqə əldə edilməsi də müzakirələrə səbəb olub. Bu məsələ parlamentdə qaldırılıb və Liberal Demokratların lideri Ed Devrinin sualına cavab verən Baş nazir Keir Starmer, Krallıq mülkləri ilə bağlı uyğun araşdırmanı dəstəklədiyini bildirib.
Təzyiqlərdən sonra Mountbatten-Uindsor Vindzor qalasındakı evini tərk edərək, Kral Çarlzın şəxsi mülkiyyəti olan Sendringem Sarayı ərazisindəki fermaya köçüb. Onun keçmiş həyat yoldaşı Sarah Ferqyusonun da Epşteynlə dostluğu üzə çıxıb; nəticədə Ferqyusonun rəhbərlik etdiyi bir sıra xeyriyyə qurumları fəaliyyətini dayandırıb.
