Azərbaycan Respublikasının Prezidenti İlham Əliyev mayın 5-də Parlamentlərarası İttifaqın Baş katibi Martin Çunqonqu qəbul edib. Görüşdə Azərbaycanla Ermənistan arasında sülh gündəliyi, parlamentlərarası dialoqun inkişafı, işğaldan azad olunmuş ərazilərdə aparılan bərpa işləri və mina problemi müzakirə olunub.
Söhbət zamanı Prezident İlham Əliyevin Martin Çunqonqla əvvəlki görüşləri məmnunluqla xatırlanıb. Parlamentlərarası İttifaqın Baş katibi Azərbaycanla Ermənistan arasında sülh prosesində əldə olunan nailiyyətlər, həmçinin Azərbaycanın ərazi bütövlüyü və suverenliyinin tam bərpası münasibətilə dövlət başçısını təbrik edib. Prezident İlham Əliyev təbriklərə görə minnətdarlığını bildirib.
Dövlət başçısı Azərbaycanla Ermənistan arasında Vaşinqtonda sülh gündəliyi üzrə əldə edilmiş nəticələrə toxunaraq, iki ölkə arasında artıq iqtisadi-ticari münasibətlərin başladığını qeyd edib. Prezident bildirib ki, Azərbaycan birtərəfli qaydada Ermənistana gedən tranzit yüklər üzərindəki məhdudiyyəti aradan qaldırıb.
Görüşdə Prezident İlham Əliyevin İrəvanda keçirilmiş “Avropa Siyasi Birliyi”nin VIII Zirvə toplantısında videobağlantı formatında iştirakı Azərbaycan-Ermənistan münasibətlərinin normallaşması istiqamətində tarixi hadisə kimi qiymətləndirilib. AZƏRTAC-ın məlumatına görə, dövlət başçısının həmin sammitdə videobağlantı ilə çıxışı mayın 4-də baş tutub.
Prezident İlham Əliyev Parlamentlərarası İttifaqın Azərbaycanla Ermənistan arasında parlament xətti üzrə dialoqun təşviqində, həmçinin iki ölkənin parlament sədrlərinin sülh prosesinin müzakirəsi üçün mütəmadi görüşlərinə şərait yaradılmasında rolunu müsbət qiymətləndirib.
Söhbət zamanı Azərbaycanla Parlamentlərarası İttifaq arasında uğurlu əməkdaşlığın həyata keçirildiyi vurğulanıb. Martin Çunqonq Azərbaycanın təşkilatın işində fəal iştirak etdiyini və parlamentlərarası dialoqa mühüm töhfə verdiyini bildirib.
Görüşdə işğaldan azad edilmiş ərazilərdə aparılan genişmiqyaslı bərpa-quruculuq işləri də müzakirə olunub. Eyni zamanda, Azərbaycanın mina problemindən əziyyət çəkdiyi, minaların mülki şəxslər üçün təhlükə yaratdığı və quruculuq prosesinə ciddi maneələr törətdiyi qeyd edilib.
