Filippin Senatında senator Ronald “Bato” dela Rosa ətrafında yaranan gərginlik zamanı atəş səsləri eşidilib. Hadisə Beynəlxalq Cinayət Məhkəməsi tərəfindən axtarılan senatorun həbsinə cəhdlə bağlı qarşıdurma fonunda baş verib.
“Reuters”-in məlumatına görə, atışma zamanı ölən və ya yaralanan olmayıb.
Dela Rosa keçmiş prezident Rodriqo Dutertenin hakimiyyəti dövründə Filippin Milli Polisinin rəhbəri olub və hökumətin sərt anti-narkotik kampaniyasının əsas fiqurlarından biri sayılır. BCM onu həmin kampaniya çərçivəsində törədildiyi iddia olunan insanlığa qarşı cinayətlərdə ittiham edir. “Associated Press”-in məlumatına görə, məhkəmənin orderində 2016-2018-ci illərdə azı 32 nəfərin öldürülməsi ilə bağlı epizodlar yer alır.
Hadisə Dela Rosanın Senat binasında qalması və müttəfiqlərinin onu “qanunverici müdafiə” altına alması fonunda baş verib. Senator daha əvvəl tərəfdarlarını onun Haaqaya təhvil verilməsinə imkan verməməyə çağırıb. O, qanunsuz qətllər barədə ittihamları rədd edir və Filippin məhkəmələri qarşısında cavab verməyə hazır olduğunu, lakin xarici yurisdiksiyanı qəbul etmədiyini bildirir.
Filippin Prezidenti Ferdinand Markos Jr. hadisədən sonra sakitliyə çağırıb və atəşin kim tərəfindən açıldığının araşdırılacağını bildirib. Senatda təhlükəsizlik tədbirləri gücləndirilib, təhlükəsizlik kameralarının görüntülərinin araşdırıldığı qeyd olunur.
“The Guardian” yazır ki, Dela Rosa aylarla ictimaiyyət qarşısına çıxmadıqdan sonra bu həftə Senata qayıdıb və bundan sonra binada gərginlik artıb. BCM daha əvvəl keçmiş prezident Rodriqo Duterteni də anti-narkotik kampaniyası ilə bağlı insanlığa qarşı cinayətlərdə ittiham etmişdi; Duterte hazırda Haaqada məhkəmə prosesini gözləyir.
