FIFA İspaniya millisinin Misirlə yoldaşlıq oyununda azarkeşlərin islamofob şüarlar səsləndirməsinə görə İspaniya Kral Futbol Federasiyasını (RFEF) 20 min dollar cərimələyib. Federasiya qərardan İdman Arbitraj Məhkəməsinə (CAS) şikayət edəcəyini açıqlayıb.
MSNews.az xəbər verir ki, bu barədə “Reuters” agentliyi məlumat yayıb. FIFA maliyyə cəzası ilə yanaşı, İspaniya millisinin növbəti ev yoldaşlıq görüşündə stadionun azı 15 faizinin tamaşaçılar üçün bağlanılmasına qərar verib.
Hadisə martın 31-də Barselona yaxınlığındakı RCDE stadionunda keçirilən və 0:0 hesabı ilə başa çatan İspaniya–Misir qarşılaşmasında yaşanıb. Yerli azarkeşlərin bir qismi oyun zamanı “Kim tullanmırsa, müsəlmandır” şüarını səsləndirib.
Şüarlar təkrarlandıqdan sonra stadionda xəbərdarlıq elan olunub və böyük ekranda ayrı-seçkiliyə qarşı mesaj nümayiş etdirilib.
İspaniya millisinin müsəlman futbolçusu Lamin Yamal hadisəyə sərt reaksiya verərək bu davranışı hörmətsizlik və qəbuledilməz hal adlandırıb. O, şüar səsləndirən azarkeşləri irqçilikdə ittiham edib.
Hadisədən sonra İspaniya polisi araşdırmaya başlayıb, FIFA isə federasiya barəsində intizam icraatı açıb.
Lakin FIFA bu arqumenti qəbul etməyib. Qurumun mövqeyinə görə, sözün birbaşa təhqir mənası daşıması vacib deyil. Onun konkret vəziyyətdə insanları dini mənsubiyyətinə görə aşağılamaq və ya ələ salmaq məqsədilə işlədilməsi ayrı-seçkilik hesab oluna bilər.
Federasiyanın ilkin apellyasiya şikayəti rədd edilib. RFEF isə oyunda dərhal müdaxilə etdiyini, təhlükəsizlik tədbirlərini gücləndirdiyini və məsul şəxslərin müəyyənləşdirilməsi üçün hüquq-mühafizə orqanları ilə əməkdaşlıq etdiyini vurğulayıb.
İspaniyanın “RTVE” telekanalının məlumatına görə, federasiya cəzanı həddindən artıq sərt hesab edir və qərarın dəyişdirilməsi üçün CAS-a müraciət etmək niyyətindədir.
Qeyd edək ki, CAS hələlik məsələ ilə bağlı qərar qəbul etməyib. FIFA-nın tətbiq etdiyi sanksiyalar isə qüvvədədir.
