İngiltərə millisinin DÇ-2026 üçün heyəti açıqlandı. Britaniya mediasının məlumatına görə, baş məşqçi Tomas Tuxel 26 nəfərlik siyahıda bir sıra gözlənilməz qərarlar verib. Ən çox diqqət çəkən məqamlar Fil Foden, Koul Palmer və Harri Maquayrın mundial heyətindən kənarda qalmasıdır.
“The Guardian”ın məlumatına görə, rəsmi açıqlama bu gün — mayın 22-də verilməlidir, lakin heyətin əsas konturları artıq bəlli olub. İngiltərə Futbol Assosiasiyası da Tuxelin DÇ-2026 üçün 26 nəfərlik heyəti mayın 22-də açıqlayacağını, komandanın turnir öncəsi Floridada təlim-məşq toplanışına yollanacağını bildirib.
Yayılan siyahıya əsasən, qapıçılar sırasında Cordan Pikford, Din Henderson və Ceyms Trafford yer alır. Müdafiə xəttində Ezri Konsa, Con Stounz, Mark Gehi, Den Börn, Carell Kuansa, Tino Livramento, Niko O’Rayli, Ced Spens və Ris Ceymsin adı çəkilir.
Yarımmüdafiədə Deklan Rays, Elliot Anderson, Kobbi Maynu, Cordan Henderson, Morqan Rocers, Cud Bellinqem və Ebereçi Eze yer alıb. Hücum xəttində isə Harri Keyn, Ayven Touni, Olli Uotkins, Bukayo Saka, Noni Madueke, Markus Reşford və Entoni Qordonun mundiala aparılacağı bildirilir. “The Guardian” yazır ki, Tuxel yaradıcılıq xəttində Bellinqem, Eze və Rocersə üstünlük verib, Foden və Palmer isə zəif klub mövsümü və İngiltərə millisində son çıxışları səbəbindən heyətdən kənarda qalıb.
İngiltərə DÇ-2026-da qrup mərhələsinə iyunun 17-də Dallasda Xorvatiyaya qarşı oyunla başlayacaq. Daha sonra Tuxelin komandası iyunun 23-də Bostonda Qana, iyunun 27-də isə Nyu-Cersidə Panama ilə qarşılaşacaq.
