Ermənistan gələcəkdə Azərbaycanla enerji sahəsində əməkdaşlığı inkişaf etdirmək niyyətindədir. Bu barədə Metsamor Atom Elektrik Stansiyasının (AES) baş direktoru Eduard Martirosyan açıqlama verib.
MSNews.az xəbər verir ki, Martirosyan Moskvada keçirilən IX Rusiya Enerji Həftəsi forumundakı çıxışında Ermənistanın qonşu ölkələrlə enerji əlaqələrinin genişləndirilməsinə önəm verdiyini bildirib.
“Report” agentliyinin Ermənistan mediasına istinadən yaydığı məlumata görə, Martirosyan Azərbaycanla əməkdaşlığın gələcək perspektivlər sırasında olduğunu vurğulayıb.
“Ermənistan qonşu ölkələr – İran və Gürcüstanla, perspektivdə isə Azərbaycanla enerji sahəsində əməkdaşlığı inkişaf etdirmək niyyətindədir”, – deyə o bildirib.
AES rəhbəri çıxışında atom energetikasının Ermənistan üçün strateji əhəmiyyət daşıdığını da qeyd edib. Onun sözlərinə görə, ölkə elektrik enerjisi istehsalında mühüm rol oynayan Metsamor AES-in istismar müddətinin uzadılması istiqamətində fəaliyyətini davam etdirəcək.
“Biz stansiyanın istismar müddətini uzatmışıq və düşünürəm ki, bu iş yaxın bir neçə il ərzində də davam etdiriləcək”, – Martirosyan əlavə edib.
Ermənistanın “Aurora News” nəşrinin məlumatına görə, Metsamor AES ölkənin elektrik enerjisinə tələbatının təxminən 30–40 faizini təmin edir. Son 6–8 ildə stansiyanın modernləşdirilməsinə və istismar müddətinin uzadılmasına təxminən 500 milyon dollar ayrılıb.
Qeyd edək ki, sentyabrda Tbilisidə keçirilən IX Dünya Enerji Tənzimlənməsi Forumunda Azərbaycan, Ermənistan və Gürcüstanın enerji tənzimləyici qurumlarının nümayəndələri regional enerji sistemlərinin inteqrasiyası imkanlarını da müzakirə ediblər.
Azərbaycanla enerji əməkdaşlığına dair açıqlama hələlik gələcək perspektivləri əhatə edir. Tərəflər arasında konkret layihə və ya yeni enerji tədarükü razılaşması barədə məlumat verilməyib.
