Ceffri Epşteynlə bağlı açıqlanan yeni sənədlərdə Norveç, Danimarka və İsveç krallıq ailələrindən bir sıra şəxslərin adlarının yer aldığı bildirilib.
ABŞ Ədliyyə Nazirinin müavini Todd Blanş Epşteyn istintaqı çərçivəsində 3 milyondan çox yeni sənədin ictimaiyyətə açıldığını elan etdikdən sonra sənədlərdə Şimali Avropa krallıq ailələrinə aid adlar diqqət çəkib.
Norveçin dövlət yayımçısı “NRK”-nın məlumatına görə, sənədlərdə Mette-Maritin adı yüzlərlə dəfə qeyd olunur. Xüsusilə 2011-ci ilə aid bir elektron yazışmada vəliəhdin Epşteynin adını internetdə araşdırdığı və bu barədə onunla ünsiyyətdə olduğu bildirilir.
Norveç vəliəhdi Mette-Marit Norveç mediasına açıqlamasında Epşteynin törətdiyi əməllərə görə məsuliyyət daşıdığını bildirərək, onun keçmişini kifayət qədər araşdırmadığına görə dərin təəssüf hissi keçirdiyini deyib. Vəliəhd Epşteyn ilə hər hansı formada əlaqədə olduğu üçün peşman olduğunu və bunun onun üçün utancverici olduğunu vurğulayıb.
Mette-Marit daha əvvəl — 2019-cu ildə də Epşteyn ilə görüşündən peşman olduğunu bildirmiş, 2013-cü ildə onunla əlaqəni kəsdiyini desə də, sonradan 2014-cü ildə Florida ştatında Epşteyn ilə görüşdüyü ortaya çıxmışdı.
Yeni açıqlanan sənədlərdə Frederikin adının iki dəfə keçdiyi bildirilib. Danimarka Krallıq Sarayı yerli mediaya açıqlamasında kral Frederikin Epşteyn ilə heç vaxt şəxsən tanış olmadığını bəyan edib.
Bununla belə, sənədlərdə Frederikin şahzadə olduğu dövrdə Epşteynin əlaqələrindən olan bir iş adamı ilə görüşdüyü və bir dəfə xüsusi şam yeməyində iştirak etdiyi iddia olunur.
Sənədlərdə adı çəkilən digər şəxs isə Sofia olub. İsveç mediası şahzadə Sofiyanın 2012-ci ildə Nyu Yorkda Epşteynin xüsusi dəvətlisi qismində bir film nümayişinə qatıldığını yazıb.
İsveç Krallıq Sarayı isə daha əvvəlki açıqlamasında şahzadə Sofiyanın 2005-ci ildə Epşteyn ilə bir neçə dəfə görüşdüyünü, lakin son 20 il ərzində onunla heç bir əlaqəsinin olmadığını bildirmişdi.
