Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura ikigünlük səfəri başlayıb. Nümayəndə heyətini Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev müşayiət edir. Səfərdə 62 ölkə və beynəlxalq təşkilatı təmsil edən 150-dən çox səfir, diplomat, hərbi attaşe və digər nümayəndə iştirak edir.
Səfər Xankəndi, Xocalı, Şuşa və Laçın rayonunu əhatə edəcək. Qonaqlar bölgədə aparılan bərpa və yenidənqurma işləri, həmçinin sosial-iqtisadi infrastruktur obyektləri ilə yerində tanış olacaqlar.
Nümayəndə heyətinin səfəri Xocalı Soyqırımı Memorialını ziyarətlə başlayıb. Hikmət Hacıyev “X” hesabında paylaşım edərək bildirib ki, diplomatik korpus üzvləri ilə birlikdə Xocalı qurbanlarının xatirəsi dərin ehtiramla yad edilib. O qeyd edib ki, “keçmişin bəzi səhifələrinə göz yummaq mümkün deyil”.
Daha sonra diplomatlar Xankəndidə Qarabağ Universiteti ilə tanış olublar. Qonaqlara universitetdə yaradılan şərait, tədris prosesi və tələbə-müəllim heyəti üçün qurulan imkanlar barədə məlumat verilib.
Qarabağ Universitetində çıxış edən Hikmət Hacıyev Xankəndinin yeni həyat qazandığını və Cənubi Qafqazın ən dinc şəhərlərindən birinə, eyni zamanda gənclər mərkəzinə çevrildiyini bildirib. O vurğulayıb ki, Qarabağ innovasiya, inkişaf, quruculuq və bərpa məkanıdır; Azərbaycan son beş ildə bu prosesi əsasən öz resursları, maliyyə imkanları və institusional mexanizmləri hesabına həyata keçirir.
Prezidentin köməkçisi diplomatik korpus nümayəndələrini Qarabağ Universitetinin xarici ali məktəblərlə əlaqələrinin gücləndirilməsinə dəstək verməyə çağırıb. Onun sözlərinə görə, bu cür əməkdaşlıq gənclər arasında bilik mübadiləsinə, təhsilin inkişafına və sülh gündəliyinin möhkəmlənməsinə xidmət edə bilər.
Səfər çərçivəsində nümayəndə heyəti Qarabağ Universitetinin sərgi mərkəzi və klinikasına da baş çəkib. Klinikanın baş direktoru Samir Babayev qonaqlara universitet və tibb sahəsində tətbiq edilən texnologiyalar barədə məlumat verib. Diplomatlar burada təhsil alan tibb tələbələrinin hazırlıq prosesi ilə də tanış olublar.
Bu səfər Azərbaycanın işğaldan azad edilmiş ərazilərdə həyata keçirdiyi bərpa-quruculuq işlərinin, təhsil və sosial infrastruktur layihələrinin beynəlxalq diplomatik ictimaiyyətə təqdim edilməsi baxımından əhəmiyyətli hesab olunur.
