Ukrayna və Polşa arasında tarixi yaddaşla bağlı diplomatik gərginlik yeni mərhələyə keçib.
MSNews.az xəbər verir ki, “Reuters” agentliyinin məlumatına görə, Kirilo Budanov Polşanın “Xidmətlərə görə” ordeninin Qızıl Zabit Xaçından imtina etdiyini açıqlayıb.
Bu qərar Polşa Prezidenti Karol Navrotskinin Ukrayna Prezidenti Volodimir Zelenskini ölkənin ən yüksək dövlət mükafatı olan “Ağ Qartal” ordenindən məhrum etməsindən sonra verilib.
Budanov sosial şəbəkədəki paylaşımında Polşa tərəfinin qərarını Ukrayna-Polşa münasibətləri üçün zərərli addım kimi qiymətləndirib. O bildirib ki, xalqlar arasında həm qəhrəmanlıq, həm də faciəli səhifələr var, lakin bu mövzular siyasi manipulyasiya üçün istifadə edilməməlidir.
“Reuters” yazır ki, Budanov Polşanın addımını “Rusiya üçün hədiyyə” adlandırıb. Onun sözlərinə görə, belə qərarlar Ukrayna ilə Polşa arasında strateji tərəfdaşlığı zəiflədə bilər.
Daha əvvəl Ukraynanın xarici işlər naziri Andrey Sibiqa da Polşanın “Xidmətlərə görə” ordeninin Komandor Xaçından imtina etdiyini bildirmişdi. “UNIAN” yazır ki, Sibiqa Navrotskinin qərarını “düşünülməmiş addım” adlandırıb və aldığı Polşa dövlət mükafatını geri qaytaracağını açıqlayıb.
Qalmaqal Ukraynada hərbi hissələrdən birinə İkinci Dünya müharibəsi dövründə fəaliyyət göstərmiş Ukrayna Üsyançı Ordusunun — UPA-nın adının verilməsi fonunda yaranıb. Polşada UPA Volın qırğınları ilə bağlı ağır tarixi yaddaşın əsas simvollarından biri kimi qəbul edilir.
Polşanın Baş naziri Donald Tusk isə tərəfləri sakitliyə çağırıb və Ukrayna ilə Polşa arasında strateji müttəfiqliyin qorunmasının vacibliyini vurğulayıb.
Müşahidəçilər hesab edirlər ki, orden qalmaqalı Kiyev və Varşava arasında münasibətlərdə tarixi yaddaş məsələsinin yenidən ciddi siyasi riskə çevrildiyini göstərir.
