Bolqarıstanın Qara dənizdəki müstəsna iqtisadi zonasında iki ticarət gəmisi dron hücumuna məruz qalıb. Gəmilərdən biri batıb, digər gəminin 18 nəfərlik heyəti isə xilas edilib. Hücumun kim tərəfindən həyata keçirildiyi Bolqarıstan tərəfindən hələ rəsmən müəyyənləşdirilməyib.
MSNews.az xəbər verir ki, hadisə oktyabrın 6-na keçən gecə Bolqarıstanın Byala şəhərindən təxminən 70 dəniz mili aralıda baş verib.
Toqo bayrağı altında üzən “Alfa Watan” güclü partlayışdan sonra qısa müddətdə batıb. Bolqarıstan Dəniz Administrasiyasının məlumatına görə, axtarış-xilasetmə əməliyyatı zamanı yalnız çevrilmiş xilasedici qayıq, üç sal və gəminin avadanlıqlarına aid qalıqlar aşkar edilib. Heyətin izinə rast gəlinməyib və axtarış əməliyyatı oktyabrın 6-da dayandırılıb.
İkinci gəmi — Palau bayraqlı “Able” isə hücumdan sonra yanmağa başlayıb. Gəmidəki 18 dənizçi Bolqarıstanın “Dioscuria” bərəsi tərəfindən təxliyə edilib. Onlardan ən azı ikisinin xəsarət aldığı bildirilir. Gəminin mühərrik bölməsinin ciddi şəkildə su ilə dolduğu və onun da batma riskinin yüksək olduğu qeyd olunur.
Bolqarıstanın baş naziri Rumen Radev hadisədən sonra təcili hökumət iclası keçirib və ticarət gəmilərinə hücumu beynəlxalq dəniz hüququnun ciddi pozuntusu adlandırıb. Lakin Sofiya indiyədək hücumun hansı tərəfdən həyata keçirildiyini açıqlamayıb.
Ukrayna prezidenti Volodimir Zelenski isə hücuma görə Rusiyanı ittiham edib və bunun hava və dəniz dronlarının birgə istifadəsi ilə həyata keçirildiyini bildirib. O, Ukrayna qüvvələrinin həmin ərazidə əməliyyat aparmadığını deyib. Bu ittiham Bolqarıstan tərəfindən hələ rəsmi şəkildə təsdiqlənməyib.
