İsrailin sabiq baş naziri və müxalif “B’Yachad” partiyasının lideri Naftali Bennett Türkiyə və Qətərin Qəzzanın gələcək idarəetmə və təhlükəsizlik mexanizmində iştirakına qarşı çıxaraq bu rolda Misirin önə çıxarılmasını təklif edib.
MSNews.az xəbər verir ki, Bennett avqustun 19-da partiyasının milli təhlükəsizlik konfransında çıxışı zamanı İsrail ordusunun HƏMAS tam tərksilah edilməyənədək Qəzzadakı “sarı xətt”dən geri çəkilməməli olduğunu bildirib.
“Biz HƏMAS tamamilə tərksilah edilənədək və silahlar Qəzzadan çıxarılanadək sarı xətdən bir millimetr belə geri çəkilməyəcəyik. Qəzza zolağının bütün ərazisində təhlükəsizlik baxımından fəaliyyət azadlığımızı qoruyacağıq”, – Bennett deyib.
Bu barədə “The Times of Israel” məlumat yayıb.
Bennett daha sonra Türkiyə və Qətərin Qəzzadakı roluna sərt münasibət bildirib:
“Türkiyə və Qətəri Qəzzadan çıxaracaq, onların yerinə Misiri gətirəcəyik. Türkiyə və Qətərə Qəzzanı idarə etməyə imkan verən hər kəs HƏMAS-ın tərksilahına mane olur”, – sabiq baş nazir bildirib.
“i24NEWS” Bennettin mövqeyini açıqlayaraq bildirir ki, siyasətçi Qətər və Türkiyənin HƏMAS-ın qorunub saxlanılmasında maraqlı olduğunu iddia edir. Onun fikrincə, Misirin maraqları isə HƏMAS və “Müsəlman Qardaşlar” hərəkatının zəiflədilməsi baxımından İsrailin mövqeyinə daha yaxındır. Bu, Bennettin siyasi qiymətləndirməsidir.
Bennett həmçinin Qətərin İsrail tərəfindən rəsmi şəkildə “düşmən dövlət” elan edilməsini təklif edib. O, hazırkı İsrail hökumətini HƏMAS-ın məhv edilməsi məqsədindən geri çəkilməkdə və Qəzza ilə bağlı təhlükəsizlik qərarlarında Doha və digər xarici aktorların təsirinə həddindən artıq imkan verməkdə ittiham edib.
Hazırda isə Misir, Türkiyə və Qətər Qəzza üzrə atəşkəs və ABŞ Prezidenti Donald Trampın sülh planının həyata keçirilməsi prosesində birgə vasitəçi kimi çıxış edirlər. Avqustun 20-də üç ölkə İsrailin son zərbələrinin sülh planının icrasına mane olduğunu bildirən birgə bəyanat yayıb.
