Azərbaycanda ilk sukukun buraxılışına hazırlıq aparılır.
MSNews.az xəbər verir ki, bu barədə Azərbaycan Mərkəzi Bankının sədri Taleh Kazımov Bakıda keçirilən İslam İnkişaf Bankı Qrupunun 51-ci illik toplantıları çərçivəsində təşkil olunan 20-ci Qlobal İslam Maliyyəsi Forumunda bildirib.
Söhbət islam maliyyəsində istiqraz ekvivalenti kimi tanınan sukuk alətinin Azərbaycanda ilk dəfə buraxılışından gedir.
Taleh Kazımov bildirib ki, sukukun ölkədə tətbiqi üçün əlverişli mühitin formalaşdırılması məqsədilə İslam İnkişaf Bankı ilə birgə layihə həyata keçirilir.
Onun sözlərinə görə, layihə Azərbaycanda möhkəm hüquqi və tənzimləyici bazanın yaradılmasına, maliyyə institutlarının islam maliyyəsi sahəsində potensialının gücləndirilməsinə, monitorinq və qiymətləndirmə mexanizmlərinin qurulmasına, həmçinin ilk sukuk emissiyasının həyata keçirilməsinə şərait yaratmalıdır.
“APA” da Mərkəzi Bank sədrinə istinadən yazır ki, bu addım Azərbaycanın maliyyə sektorunun diversifikasiyasına xidmət edəcək.
Kazımov qeyd edib ki, Azərbaycan dayanıqlılığa yönəlmiş islam maliyyəsi alətlərini inkişaf etdirir. Onun fikrincə, islam maliyyəsi inklüziv iqtisadi inkişaf və adaptiv maliyyə sistemlərinin qurulması baxımından mühüm alət ola bilər.
20-ci Qlobal İslam Maliyyəsi Forumu Bakıda “İslam maliyyəsi vasitəsilə dayanıqlı rifaha nail olmaq” mövzusu altında keçirilir.
İslam İnkişaf Bankının rəsmi saytında qeyd olunur ki, 51-ci illik toplantılar 16-19 iyun tarixlərində Bakıda keçirilir və tədbirə maliyyə, iqtisadiyyat, planlaşdırma nazirləri, mərkəzi bank rəhbərləri, beynəlxalq maliyyə institutlarının nümayəndələri və özəl sektor təmsilçiləri daxil olmaqla 2000-dən çox iştirakçının qatılması gözlənilir.
Sukuk ənənəvi istiqrazlara bənzər maliyyə aləti hesab olunsa da, islam maliyyəsi prinsiplərinə uyğun şəkildə strukturlaşdırılır. Bu mexanizmdə faiz gəliri əvəzinə aktivlər və ya layihələrdən əldə olunan gəlir əsas rol oynayır.
Azərbaycanda ilk sukuk buraxılışının reallaşması ölkənin maliyyə bazarlarında yeni alətlərin tətbiqi, investor bazasının genişləndirilməsi və islam maliyyəsi üzrə regional əməkdaşlığın artırılması baxımından mühüm addım kimi qiymətləndirilir.
