Azərbaycan Amerikanın CNN telekanalına qarşı ABŞ-ın Delaver dairəsi üzrə federal məhkəməsində iddia qaldırıb. Məhkəmə müraciətinə səbəb telekanalın iyunun 5-də İsrailin İrana qarşı hərbi və kəşfiyyat əməliyyatlarında Azərbaycan ərazisindən istifadə etdiyi barədə yaydığı məlumat olub.
MSNews.az xəbər verir ki, “Report” iddianın 17 avqust 2026-cı ildə Delaver dairəsi üzrə ABŞ Federal Məhkəməsinə təqdim edildiyini bildirib. Nəşrin məlumatına görə, məhkəmənin məhz Delaverdə seçilməsi CNN-in hüquqi strukturunun həmin ştatda qeydiyyatdan keçməsi ilə əlaqədardır.
Mübahisə CNN-in 5 iyun materialından qaynaqlanır. Telekanal bir neçə mənbəyə istinadən İsrail xüsusi təyinatlılarının və “Mossad” əməkdaşlarının Azərbaycanın cənubunda, İran sərhədi yaxınlığında fəaliyyət göstərdiyini, buradan İran daxilində kəşfiyyat və dron əməliyyatları həyata keçirildiyini iddia etmişdi. CNN-in həmin günə aid rəsmi efir transkriptində də bu məlumatlar yer alır.
Eyni transkriptdə Azərbaycanın ABŞ-dakı səfirliyinin mövqeyi də göstərilib. Bakı Azərbaycan ərazisinin üçüncü ölkələrə qarşı əməliyyatlarda istifadə edilməsinə dair iddiaları qəti şəkildə rədd etdiyini CNN-ə bildirmişdi. İsrail hökuməti isə həmin vaxt telekanalın iddialarını nə təsdiqləmiş, nə də təkzib etmişdi.
“Report”-un məlumatına görə, Azərbaycan tərəfi material dərc edildikdən sonra CNN-dən mübahisəli iddiaları geri götürməyi və düzəliş etməyi tələb edib. 6 iyun, 23 iyun və 2 iyulda telekanala bununla bağlı təkrar rəsmi müraciətlər göndərilib. CNN-in müraciətləri araşdıracağını bildirdiyi, lakin sonradan məqalədə dəyişiklik etmədiyi və iddiaları geri götürmədiyi qeyd olunur.
Azərbaycan tərəfi hesab edir ki, CNN Bakının mövqeyini materialda yetərincə əks etdirməyib, əsas iddialar isə anonim mənbələrə əsaslanıb.
Hazırda CNN-in Azərbaycandan daxil olan məhkəmə iddiasına dair açıq rəsmi reaksiyası barədə məlumat yoxdur. İş üzrə məhkəmənin mövqeyi də hələ açıqlanmayıb. Buna görə mübahisəli məlumatların hüquqi baxımdan yalan və ya böhtan xarakterli olub-olmadığına dair yekun qiyməti məhkəmə prosesi müəyyən edəcək.
