Moskvaya gələn ABŞ Hərbi Hava Qüvvələrinə məxsus C-17 Globemaster III təyyarəsinin Rusiyada həbsdə olan ABŞ vətəndaşı Çarlz Ueyn Zimmermanın mümkün azadlığa buraxılması ilə də əlaqəli ola biləcəyi iddia edilir.
MSNews.az xəbər verir ki, Rusiyanın “Ostorojno Media” nəşrinin mənbəsinə görə, Zimmerman bu yay cəzaçəkmə müəssisəsində əfv ərizəsi imzalayıb və sənəd sonradan Moskvaya göndərilib. Bununla belə, ABŞ hərbi təyyarəsinin səfəri ilə Zimmermanın işi arasında əlaqə olduğuna dair rəsmi təsdiq yoxdur. Bu ehtimalı “The War Zone” da “Ostorojno Media”ya istinadən qeyd edib.
C-17 təyyarəsi avqustun 25-də Latviyanın Riqa şəhərindən Moskvadakı Vnukovo hava limanına enib. “Reuters” uçuş izləmə məlumatlarına əsasən təyyarənin bundan əvvəl Vaşinqton yaxınlığındakı Endryus aviabazasından Riqaya gəldiyini bildirib. İlk saatlarda təyyarənin nə daşıdığı və səfərin məqsədi açıqlanmamışdı.
Sonradan ABŞ mediası C-17-nin göyərtəsində Mərkəzi Kəşfiyyat İdarəsinin direktoru Con Retklifin olduğunu açıqlayıb. “Reuters” Retklifin Moskvada Rusiya rəsmiləri ilə əvvəlcədən elan edilməyən danışıqlar keçirdiyini yazıb. Buna görə təyyarənin əsas missiyasının CIA rəhbərinin səfəri olduğu artıq təsdiqlənib, lakin onun eyni zamanda məhbus məsələsində istifadə edilib-edilmədiyi məlum deyil.
Zimmerman 2026-cı ilin yanvarında Rusiyada odlu silah və sursatın sərhəddən qanunsuz keçirilməsinə görə beş il müddətinə azadlıqdan məhrum edilib. “Reuters” Rusiya məhkəmə xidmətinə istinadən bildirirdi ki, amerikalı 2024-cü ildə Şimali Karolinadan yaxta ilə yola çıxıb, Avropa və Aralıq dənizi marşrutu ilə hərəkət etdikdən sonra 2025-ci ilin iyununda Soçiyə çatıb.
Məhkəmənin məlumatına görə, Zimmerman internet vasitəsilə tanış olduğu Kazan sakini qadınla görüşmək üçün Rusiyaya getdiyini bildirib. O, yaxtada saxladığı silahı özünümüdafiə məqsədilə aldığını, Rusiya qanunvericiliyini bilmədiyini və silahın gəmidə saxlanmasına icazə verildiyini düşündüyünü deyib. Zimmerman məhkəmədə günahını etiraf edib.
Hazırda Zimmermanın əfv olunması və ya ABŞ-a qaytarılması barədə Rusiya və ABŞ rəsmilərindən açıqlama verilməyib. Buna görə C-17 təyyarəsinin onun azad edilməsi üçün Moskvaya göndərildiyi barədə məlumat hələlik təsdiqlənməmiş ehtimal olaraq qalır.
