ABŞ-da silahlı insident baş verib. Rod-Aylend ştatının Providens şəhərində, Braun Universitetinin kampusu yaxınlığında atışma qeydə alınıb. Hadisə ilə bağlı məlumatı yerli fövqəladə xidmətlər və rəsmi qurumlar yayıb.
Providens dairəsinin yanğınsöndürmə xidmətinin ilkin açıqlamasına görə, atışma nəticəsində azı 8 nəfər xəsarət alıb, mümkün qurbanların sayının daha çox ola biləcəyi bildirilib. Daha sonra şəhər rəhbərliyi məlumatı dəqiqləşdirərək hadisə nəticəsində 2 nəfərin həyatını itirdiyini, bir neçə nəfərin isə yaralandığını açıqlayıb.
Providens şəhərinin meri Bret Smayli bildirib ki, 8 yaralının vəziyyəti kritik olsa da stabildir. O, məlumatların istintaq gedişində yenilənə biləcəyini qeyd edib.
Atışma universitet kampusunun yaxınlığında, tələbələrin sessiya imtahanları və yekun qiymətləndirmələr verdiyi dövrdə baş verib. Hadisə yerinə şəhərin bütün müvafiq xidmətləri cəlb olunub, ərazidə genişmiqyaslı xilasetmə və istintaq tədbirləri həyata keçirilib. Araşdırmalara Federal Təhqiqat Bürosu (FBI) də qoşulub.
Şübhəli şəxsin saxlanılması ilə bağlı məlumatlar bir neçə dəfə dəyişib. İlkin olaraq onun zərərsizləşdirildiyi və ya həbs edildiyi bildirilsə də, sonradan universitet rəhbərliyi və polis açıqlama verərək atəş açan şəxsin hələ də azadlıqda olduğunu təsdiqləyib.
Hüquq-mühafizə orqanlarının məlumatına görə, şübhəli kişidir, tamamilə qara geyimdə olub və sonuncu dəfə təxminən saat 16:00-da binanı tərk edərkən görülüb. Hadisədə istifadə olunan silah hələ tapılmayıb, onun növü də müəyyən edilməyib.
ABŞ Prezidenti Donald Tramp insident barədə məlumatlandırıldığını bildirib. O, federal qurumların hadisə yerində işlədiyini qeyd edib, həlak olanların və yaralananların ailələrinə başsağlığı verib və vəziyyətin hüquq-mühafizə orqanlarının nəzarəti altında olduğunu vurğulayıb.
Araşdırmalar davam edir. Rəsmilər vətəndaşları ehtiyatlı olmağa və təhlükəsizlik tədbirlərinə əməl etməyə çağırır.
