Azərbaycanın İsraildən 235 milyon dollar dəyərində müasir raket-artilleriya sistemləri alacağı bildirilir. Məlumata görə, razılaşma çərçivəsində ölkəyə PULS reaktiv yaylım atəşi sistemləri və 80 kilometrədək məsafədəki hədəfləri vurmaq üçün nəzərdə tutulmuş yüksək dəqiqlikli EXTRA-MR raketləri tədarük ediləcək.
MSNews.az xəbər verir ki, bu barədə İsrailin “Globes” nəşri məlumatlı mənbələrinə istinadən məlumat yayıb.
Şirkət sifarişçi ölkənin adını rəsmi məlumatında göstərməsə də, “Globes” nəşri müqavilənin Azərbaycanla bağlandığını iddia edir.
Məlumata əsasən, müqavilə İsrail Müdafiə Nazirliyi ilə sifarişçi ölkənin Müdafiə Nazirliyi arasında hökumətlərarası razılaşma çərçivəsində imzalanıb.
Razılaşmanın üç il müddətində icra edilməsi nəzərdə tutulur.
Müqaviləyə əsasən, “Elbit Systems” şirkəti aşağıdakı avadanlıqların tədarükünü həyata keçirəcək:
-
PULS reaktiv yaylım atəşi sistemləri və buraxılış qurğuları;
-
EXTRA-MR yüksək dəqiqlikli idarəolunan raketləri;
-
Əlavə raket-artilleriya platformaları;
-
İnteqrasiya edilmiş logistik dəstək vasitələri.
EXTRA-MR orta məsafələr üçün nəzərdə tutulmuş idarəolunan raketdir. Bu sistem 80 kilometrədək məsafədə yerləşən hədəflərə dəqiq zərbələr endirmək imkanına malikdir.
Raketlər “Elbit Systems” şirkətinin PULS platforması ilə uyğun işləyir və mövcud C4I komanda-idarəetmə, rabitə və informasiya sistemlərinə inteqrasiya oluna bilir.
İsrailin “Globes” nəşri yazır ki, yeni müqavilə Azərbaycanla İsrail arasında müdafiə sənayesi sahəsində əməkdaşlığın genişləndirilməsi fonunda əldə olunub.
Azərbaycan bundan əvvəl də İsrail istehsalı olan müxtəlif hərbi texnika və silah sistemləri əldə edib.
Qeyd edək ki, Azərbaycanın Müdafiə Nazirliyi 235 milyon dollarlıq müqavilənin ölkəmizlə bağlandığını hələlik rəsmən təsdiqləməyib. Sifarişçi ölkənin Azərbaycan olması barədə məlumat İsrail nəşrinin mənbələrinə əsaslanır.
