İran parlamenti Mehrdad Əxlaqi Kitabçini ölkənin yeni müdafiə və silahlı qüvvələrə maddi-texniki dəstək naziri vəzifəsinə təsdiqləyib. ABŞ və Avropa İttifaqının sanksiya siyahılarında olan 68 yaşlı Kitabçi İranın hərbi sənaye və raket proqramlarında uzunillik rəhbərlik təcrübəsinə malikdir.
MSNews.az xəbər verir ki, oktyabrın 18-də keçirilən parlament iclasında Prezident Məsud Pezeşkianın təqdim etdiyi namizədliyə baxılıb.
“Anadolu Agentliyi”nin İran dövlət televiziyasına istinadən yaydığı məlumata görə, videokonfrans formatında keçirilən iclasda 237 deputat Kitabçinin lehinə, 15 deputat isə əleyhinə səs verib. Ümumilikdə 277 səs qeydə alınıb, bitərəf səs olmayıb.
Kitabçi fevralın 28-də ABŞ və İsrailin İrana qarşı hərbi zərbələri zamanı həlak olmuş sabiq müdafiə naziri Əziz Nəsirzadəni əvəzləyib. Nəsirzadənin ölümündən sonra nazir vəzifəsini müvəqqəti olaraq Məcid ibn əl-Rza icra edirdi.
Kitabçi ABŞ və İsraili də xəbərdar edərək İrana qarşı yeni hücumların cavabsız qalmayacağını bildirib.
“Əgər düşmən yenidən səhv hesablama apararsa, İran xalqının və silahlı qüvvələrinin cavabı gözlənilməz və genişmiqyaslı olacaq”, – deyə o bildirib.
“Al Jazeera” telekanalının məlumatına görə, Kitabçinin peşəkar fəaliyyəti əsasən ballistik raketlər, aerokosmik texnologiyalar və müdafiə sənayesi ilə bağlı olub. O, əvvəllər İranın Müdafiə Sənayesi Təşkilatına (DIO) və Aerokosmik Sənaye Təşkilatına rəhbərlik edib.
ABŞ-nin Xarici Aktivlərə Nəzarət İdarəsinin (OFAC) məlumat bazasında onun adı hazırda da yer alır. Avropa İttifaqının sanksiya sənədlərində isə Kitabçinin İranın silah istehsalı, raket və pilotsuz uçuş aparatı texnologiyalarının inkişafındakı rəhbər vəzifələri qeyd olunur.
Kitabçi çıxışında İranın müdafiə imkanlarının müharibə şəraitində yenidən qiymətləndirildiyini bildirərək hərbi istehsalın və texnoloji araşdırmaların genişləndirilməsinin vacibliyini vurğulayıb.
Yeni təyinat İranın ABŞ və İsraillə hərbi qarşıdurma fonunda müdafiə sənayesinin gücləndirilməsinə üstünlük verdiyi bir dövrə təsadüf edir. Bununla belə, elan olunan proqramların hansı müddətdə və hansı həcmdə həyata keçiriləcəyi barədə konkret göstəricilər açıqlanmayıb.
