Fransanın paytaxtı Parisdə kütləvi etirazlar zamanı bir qrup nümayişçi Prezident Emmanuel Makronun rəsmi iqamətgahı olan Yelisey sarayına doğru irəliləyib. Polis saraya aparan küçələrdə təhlükəsizlik tədbirlərini gücləndirərək etirazçıların yaxınlaşmasının qarşısını alıb.
MSNews.az xəbər verir ki, oktyabrın 17-də keçirilən aksiyalar zamanı etirazçıların bir hissəsi Yelisey sarayına çatmağa çalışıb.
Fransanın “Le Monde” nəşrinin hadisə yerindən yaydığı məlumata görə, paytaxtın Respublika və Bastiliya meydanlarında toplaşan nümayişçilər arasında prezident iqamətgahına yürüş barədə məlumat yayılıb. Bundan sonra bəzi iştirakçılar saraya doğru hərəkət ediblər.
Polis Boissi-d’Anqlas küçəsində gözyaşardıcı qazdan istifadə etdikdən sonra nümayişçilər Sen-Onore küçəsi istiqamətində geri çəkiliblər.
“RTL” radiosunun məlumatına görə, Paris polis prefekturası aksiyalardan əvvəl Yelisey sarayı, Baş nazirin iqamətgahı və Şanzelize prospekti ətrafında icazəsiz nümayişlərin keçirilməsini qadağan etmişdi.
“Reuters” agentliyinin məlumatına görə, ölkə üzrə yüz minlərlə insanın qatıldığı nümayişlər zamanı bəzi şəhərlərdə polis ilə etirazçılar arasında toqquşmalar baş verib, avtomobillər yandırılıb və ictimai obyektlərə ziyan vurulub.
