Böyük Britaniyanın daxili təhlükəsizlik və əks-kəşfiyyat xidməti MI5 ölkədə müsəlmanlara və miqrantlara qarşı radikal baxışların terror aktları hazırlamaq niyyətinə çevrilməsi hallarının artdığı barədə xəbərdarlıq edib. Xüsusi xidmətin rəhbəri Ken Makkallum son bir ildə ən diqqətçəkən tendensiyalardan birinin məhz bu istiqamətdə olduğunu açıqlayıb.
MSNews.az xəbər verir ki, Ken Makkallum oktyabrın 13-də Londonda MI5-in mənzil-qərargahında keçirilən illik təhlükəsizlik brifinqində ölkənin üzləşdiyi terror təhdidlərindən danışıb. Bu barədə qurumun rəsmi saytında məlumat yayıb.
MI5 rəhbərinin sözlərinə görə, son 12 ayda antiimmiqrant və antimüsəlman düşüncələrin radikallaşaraq zorakı hücum planlarına çevrildiyi hadisələrin sayında artım müşahidə olunub. Makkallum bildirib ki, xüsusi xidmət məscidlərə, miqrasiya ilə əlaqəli müəssisələrə və sığınacaq axtaran şəxslərin yerləşdirildiyi obyektlərə hücum hazırlayan şəxslərlə bağlı araşdırmalar aparıb. O, radikal ideologiyaların internet vasitəsilə yayılmasının, xüsusilə yeniyetmələrin ekstremist qrupların təsiri altına düşməsinin ciddi təhlükə yaratdığını vurğulayıb.
MI5 rəhbəri çıxışında Şotlandiyanın İnverklayd bölgəsində yaşayan 16 yaşlı yeniyetmənin cinayət işini nümunə göstərib.
Yeniyetmə yerli islam mərkəzinə hücum planlaşdırdığı üçün 10 il müddətinə azadlıqdan məhrum edilib. İstintaqın məlumatına görə, o, Qrinok şəhərində yerləşən müsəlman mərkəzinə yandırıcı vasitələrlə hücum etməyi və çoxsaylı insanın ölümünə səbəb olmağı planlaşdırıb. Lakin hüquq-mühafizə orqanlarının müdaxiləsi nəticəsində hücumun qarşısı alınıb.
Bu barədə Britaniyanın “The Guardian” qəzeti də məlumat yayıb.
Ken Makkallum digər bir hadisədə MI5-in cəmi 13 yaşlı yeniyetmənin radikallaşması ilə bağlı araşdırma apardığını açıqlayıb. Onun sözlərinə görə, həmin araşdırma zamanı əldə edilən məlumatlar xarici tərəfdaş təhlükəsizlik qurumlarından birinə ölümcül hücumun qarşısını almaqda kömək edib.
MI5 rəhbəri ekstremist sağçı terror təhlükəsinin getdikcə daha gənc yaş qruplarını əhatə etməsindən narahatlığını ifadə edib. O bildirib ki, internet platformaları radikal fikirlərin yayılmasında və yeniyetmələrin zorakılığa təşviq edilməsində mühüm rol oynayır.
Böyük Britaniyada terror təhlükəsinin rəsmi səviyyəsi 2026-cı ilin mayında “SEVERE” kateqoriyasına yüksəldilib.
Bu səviyyə ölkədə terror hücumunun baş vermə ehtimalının yüksək qiymətləndirildiyini göstərir. MI5-in rəsmi məlumatına əsasən, təhlükə səviyyəsinin artırılmasına həm islamçı terrorçuluq, həm də ifrat sağçı ekstremizmlə əlaqəli risklər təsir göstərib.
MI5 rəhbərinin təqdim etdiyi məlumatlar Böyük Britaniyada müsəlmanlara qarşı törədilən bütün cinayətlərin statistikası deyil. Söhbət xüsusi xidmətin araşdırdığı və terror aktı hazırlığı səviyyəsinə çatdığı müəyyən edilən ekstremist fəaliyyətlərdə müşahidə olunan tendensiyadan gedir.
Bu baxımdan antiimmiqrant və antimüsəlman mövqelərin terror niyyətinə çevrilməsi ilə bağlı xəbərdarlıq bütün siyasi etirazlara və ya miqrasiya siyasətini tənqid edən şəxslərə şamil edilmir.
