Əfqanıstanda hakimiyyətdə olan “Taliban” hərəkatı Böyük Britaniyanın “BBC” yayım korporasiyasının ölkə ərazisindəki FM radio yayımlarını dayandırıb. Qərar telekanalın fəaliyyətində təkrar qayda pozuntularının baş verməsi ilə əsaslandırılsa da, Əfqanıstan rəsmiləri həmin pozuntuların nədən ibarət olduğunu açıqlamayıblar.
MSNews.az xəbər verir ki, bu barədə “Reuters” agentliyi məlumat yayıb. Qadağa oktyabrın 13-də qüvvəyə minib.
Əfqanıstanın İnformasiya və Mədəniyyət Nazirliyinin sözçüsü Xubeyb Qufran bildirib ki, “BBC”nin yayımı dəfələrlə yol verilmiş qayda pozuntularına görə müvəqqəti dayandırılıb.
“BBC”nin konkret hansı qaydaları pozduğu və yayımın bərpası üçün hansı şərtlərin yerinə yetirilməli olduğu açıqlanmayıb. Qadağanın nə qədər davam edəcəyi də məlum deyil.
Britaniyanın yayım korporasiyası qərara münasibət bildirərək Əfqanıstan əhalisinin etibarlı informasiya mənbələrinə çıxışının vacibliyini vurğulayıb.
“BBC”nin nümayəndəsi milyonlarla əfqanın qurumun xəbər və məlumatlarına etibar etdiyini, yaranmış vəziyyətin aradan qaldırılması üçün yerli hakimiyyət orqanları ilə əlaqə saxlanıldığını bildirib.
Bununla belə, “BBC”nin Əfqanıstandakı bütün fəaliyyəti dayandırılmayıb. Qurum puştu, dari və ingilis dillərində xəbərlərini qısa və orta dalğalı radio, peyk yayımı və internet platformaları vasitəsilə təqdim etməyə davam edir.
“BBC”nin məlumatına əsasən, onun proqramları Əfqanıstanda hər həftə təxminən 5,4 milyon insana, yəni ölkənin yetkin əhalisinin 20 faizindən çoxuna çatır.
“BBC”nin Əfqanıstan xidməti 1981-ci ildən fəaliyyət göstərir və ölkədə mühüm beynəlxalq informasiya mənbələrindən biri hesab olunur.
2022-ci ildə ABŞ tərəfindən maliyyələşdirilən “Amerikanın Səsi” və “Azadlıq Radiosu”nun fəaliyyətinə məhdudiyyətlər tətbiq edildikdən sonra “BBC” Əfqanıstanda FM yayımını davam etdirən əsas beynəlxalq media qurumlarından biri olaraq qalmışdı.
Son qərar ölkədə beynəlxalq xəbərlərə radio vasitəsilə çıxış imkanlarını daha da məhdudlaşdırır.
Əfqanıstanın bir çox bölgəsində elektrik enerjisinin qeyri-sabit olması, internet xidmətlərinin bahalılığı və rəqəmsal infrastruktura çıxışın məhdudluğu radionun əhali üçün əhəmiyyətini artırır.
2021-ci ildə “Taliban” yenidən hakimiyyətə gəldikdən sonra ölkədə media fəaliyyəti ilə bağlı qaydalar sərtləşdirilib. Musiqi yayımlarına və qadınların media fəaliyyətinə müxtəlif məhdudiyyətlər tətbiq olunub.
Hazırda “BBC”nin FM yayımlarının nə vaxt bərpa ediləcəyi məlum deyil. Yayım korporasiyası yaranmış problemin həlli üçün Əfqanıstan hakimiyyəti ilə danışıqları davam etdirdiyini açıqlayıb.
