Dünyada 1,2 milyard insan ağır çoxölçülü yoxsulluq şəraitində yaşayır. Onların 617 milyonunu uşaqlar təşkil edir. BMT-nin yeni hesabatına görə, yoxsulluq içində yaşayanların sayı əvvəlki qiymətləndirmə ilə müqayisədə 51,5 milyon nəfər artıb. Bu, qlobal çoxölçülü yoxsulluq indeksinin tətbiqinə başlanıldığı 2010-cu ildən bəri qeydə alınan ilk artımdır.
MSNews.az xəbər verir ki, bu barədə BMT-nin İnkişaf Proqramı (UNDP) və Oksford Universitetinin Yoxsulluq və İnsan İnkişafı Təşəbbüsünün oktyabrın 12-də dərc etdiyi 2026-cı il Qlobal Çoxölçülü Yoxsulluq İndeksi hesabatında bildirilib.
Hesabatda yoxsulluq yalnız insanların gəlirləri əsasında qiymətləndirilməyib. Qidalanma, uşaqların ölümü, təhsil imkanları, elektrik enerjisinə çıxış, içməli su, sanitariya şəraiti və mənzil şəraiti kimi göstəricilər də nəzərə alınıb.
Ən narahatedici məqamlardan biri yoxsulluqdan əziyyət çəkənlərin yarıdan çoxunun uşaqlar olmasıdır.
BMT-nin məlumatına görə, çoxölçülü yoxsulluq şəraitində yaşayan 1,2 milyard insanın 617 milyonu, yəni 51,5 faizi 18 yaşadək uşaqlardır. Bu, araşdırmaya daxil edilmiş ölkələrdə təxminən hər üç uşaqdan birinin ciddi məhrumiyyətlərlə üzləşdiyini göstərir.
Bundan əlavə, yoxsulluq içində yaşayan insanların 83 faizi kənd yerlərində məskunlaşıb. Bu göstərici yoxsulluğun xüsusilə kənd əhalisi arasında geniş yayıldığını göstərir.
BMT-nin hesabatına əsasən, göstəricinin 51,5 milyon nəfər artması bütün ölkələrdə yaşayış şəraitinin eyni dərəcədə pisləşdiyini göstərmir.
Statistik dəyişikliklərə əhalinin sayının artması, yeni demoqrafik məlumatlar və 13 ölkə üzrə yenilənmiş sorğular da təsir edib.
BMT-nin açıqlamasında vurğulanır ki, bəzi ölkələrdə yoxsulluq dərinləşsə də, digərlərində əhəmiyyətli irəliləyişlər qeydə alınıb.
Belə ki, uzunmüddətli müqayisə məlumatları mövcud olan 89 ölkədən 33-ü 15 ildən az müddətdə çoxölçülü yoxsulluq indeksini ən azı iki dəfə azalda bilib.
Onun sözlərinə görə, milyonlarla insan eyni vaxtda aclıq, təhsildən kənarda qalma, təmiz su və elektrik enerjisi çatışmazlığı kimi bir-biri ilə əlaqəli çətinliklər yaşayır.
Qeyd edək ki, hesabatda göstərilən 1,2 milyard nəfər yalnız gündəlik gəlir əsasında müəyyən edilən ifrat yoxsulluq göstəricisi deyil. Bu rəqəm səhiyyə, təhsil və yaşayış standartları üzrə bir neçə məhrumiyyətlə eyni vaxtda üzləşən insanları əhatə edir. Həmçinin göstərici dünyanın bütün ölkələrinə deyil, araşdırmaya daxil edilmiş 108 ölkəyə aiddir.
